Jabaıy aborıgender amerıkalyqty sadaqpen atyp óltirdi
ASTANA. QazAqparat - Bengal shyǵanaǵynda Andaman araldarynyń biriniń baıyrǵy turǵyndary hrıstıan dinin ýaǵyzdaýshy amerıkalyqty óltirgen.
Onyń múrdesin Soltústik Sentınel aralyna jetkizgen balyqshylardyń aıtýynsha, jergilikti aborıgender marqumdy sadaqpen atyp óltirip, denesin jaǵalaýǵa tastap ketken.
Jergilikti BAQ-tardyń habarlaýynsha, Alabama shtatynyń turǵyny 27 jastaǵy Djon Allen Cho birneshe ret Andaman araldaryna baryp, hıstıan dinin ýaǵyzdaǵan.
«Polıtsııanyń málimdeýinshe, Cho budan kem degende tórt nemese bes ret jergilikti balyqshylardyń kómegimen Soltústik Sentenel araldaryna barǵan»,-dep málim etti Bı-bı-sı-ge arhıpelagtaǵy oqıǵalardyń izin baǵyp júrgen jýrnalıst Sýbır Bhaýmık.
Birqatar derekterge qaraǵanda, Djon Cho 14 qarashada aralǵa barmaqqa tyrysqanymen sáti túspegen. Ol arada eki kún ótkennen keıin osy áreketin taǵy qaıtalaǵan.
«Oǵan sadaqtyń birneshe jebesi tıgen. Balyqshylar marqumnyń denesin jipke baılap súıretkenin kóredi. Bári budan qatty qorqyp qasha jóneledi»,-deıdi jergilikti turǵyndardyń biri.
Aıta ketsek, 2017 jyly úndi bıligi Andaman araldaryndaǵy baıyrǵy turǵyndardy sýretke ne bolmasa vıdeoǵa túsirgender úsh jylǵa túrmege qamalatyndyǵy jóninde qaýly qabyldaǵan bolatyn.
Órkenıetten tys oqshaý ómir súrip jatqan bul araldardyń baıyrǵy turǵyndarynyń sany shamamen 150 adamnan aspaıdy.
