Jabaıy qabandar Germanııa turǵyndaryn alańdatyp otyr
ASTANA. KAZINFORM – Germanııanyń batysyndaǵy Hagen qalasynda jabaıy qabandar turǵyndar úshin eleýli máselege aınalyp otyr, dep habarlaıdy DW.
Sońǵy ýaqytta janýarlar turǵyn aýdandarǵa jıi kirip, adamdardan qorqýdy doǵara bastaǵan.
Buryn qabandar tek túnde kórinse, qazir kúndiz de erkin júretin bolǵan. Turǵyndardyń biri túsirgen vıdeoda onnan astam qaban kópqabatty úılerdiń mańyndaǵy kógalda júrip, keıin jolǵa qaraı júgirgeni baıqalady.
Qala turǵyndary ásirese keshki ýaqytta ıtterin serýendetýden qorqady, óıtkeni qabandar shabýyl jasaýy múmkin. 2022 jyly bir qaban úıge kirip ketken edi, al qazir mundaı oqıǵalar jıilep barady.
Ormanshy Martın Hollniń aıtýynsha, keıbir adamdar qabandardy tamaqtandyryp, jaǵdaıdy odan ári ýshyqtyryp otyr. Sonymen qatar, qoqys pen kóshede qaldyrylǵan jem de janýarlardy qalaǵa tartady.
Mamandardyń pikirinshe, qabandardy turǵyn aımaqtarda atý qaýipti, al olardy qaıtadan ormanǵa qaıtarý da ońaı emes. Sondyqtan adamdar men jabaıy janýarlar birge ómir súrýge beıimdelýi múmkin.
Sarapshylar qabandar ádette ózdiginen shabýyl jasamaıtynyn aıtady. Eger olardy kezdestirseńiz, jaqyndamaı, ózińizdiń bar ekenińizdi aldyn ala dybys shyǵarý arqyly bildirý usynylady.
