Jabaı men Kolýton ózenderiniń deńgeıi kúrt kóterildi - TJK
NUR-SULTAN. QazAqparat - Aqmola oblysynda ózenderdiń deńgeıi tómendemeı tur. Sol sebepti eldi mekenderdi sý basý qaýpi áli de joǵary, dep xabarlaıdy QazAqparat tilshisi.
QR ІІM Tótenshe jaǵdaılar komıtetiniń tóraǵasy Vadımır Bekkerdiń aıtýynsha, qazirgi kezde Atbasarǵa jaqyn jerde Jabaı ózeniniń deńgeıi kúrt kóterilip otyr. Bir táýliktiń ishinde ózenniń deńgeıi 70 santımetrge joǵarylady.
«Búginde avtomobıl kópiri mańaıynda sýdyń deńgeıi 3 metr 45 santımetrdi qurap otyr. Budan bólek, Astraxan aýdanynda Eski Kolýton eldi mekeni janynda Kolýton ózeniniń deńgeıi 1 metr 32 santımetrge kóterilip ketti. Qazir atalǵan eldi mekenge tótenshe jaǵdaılar komıtetiniń qurylymdary tıisti sharalardy atqaryp jatyr. Arnaıy ınjenerlik texnıka da sonda», - dedi V.Bekker Astanada ótken baspasóz máslıxatynda.
Komıtet basshysynyń sózine qaraǵanda, Kolýton ózeniniń jalpy deńgeıi 3 metr 46 santımetrge jetti.
«Shamamen, bir metrdeı áli zapasta bar. Negizi, qazirdiń ózinde ózenniń deńgeıi shekti mólsherden 6 santımetrge asyp ketti. Biraq ınertti materıaldar bar, qaptar bar. Sonyń bárin qoıyp shyqqannan keıin áli de bir metrge deıingi sýdy ustaı alamyz. Biz qoldan bógetti jasap qoıdyq. Ázirshe, sol damba ustap tur. Tótenshe jaǵdaılar qurylymlary daıyn otyr», - dep atap kórsetti V.Bekker.
