Jabal Erǵalıev: Qazaq jeri - birtutas ulttyń jeri
Onyń aıtýynsha, Jer reformasy jónindegi komıssııanyń jer ıeligine qatysty normalarǵa belgilengen moratorıı merzimin 5 jylǵa uzartýy týraly sheshimi bul kóńilge senim uıalatar jaıt. «Qazaq úshin toqymdaı jer qymbat» degen Qazaqstan Prezıdenti Qasym-Jomart Toqaevtyń bir aýyz sózi kókeıden shyqqany da anyq.
«Álqıssa, keń baıtaq qazaq jerine kim kóringenniń kóz qurty túse bastaǵany kúni búgin deısiz be?! Sonaý jaýgershilik zamandarda ata-babalarymyz attan túspeı, qalmaǵy men jońǵary bar ne bir jaýlarmen osy jer úshin alysyp ótti emes pe? Odan keıin orys patshasynyń otarlaý saıasaty da qazaqqa az qasiret ákelmegeni anyq. «Edildi kelip alǵanyń etekke qoldy salǵany, Jaıyqty kelip alǵany, jaǵaǵa qoldy salǵany, Oıyldy kelip alǵany, oıyndaǵysy bolǵany» dep Murat Móńkeulynyń júregi qars aıyryla aıtqanyn da qazaq balasy umyta alar ma? Komıssııa músheleri jer ıeligine qatysty normalarǵa jyl sońyna deıin belgilengen moratorıı merzimin 5 jylǵa uzartýdy qoldap daýys berýin oryndy dep oılaımyn», - dedi Jabal Erǵalıev.
«Menshikke baılanysty «bolady ne bolmaıdy» dep sheshim qabyldamaı, ony bolashaqqa qaldyrý kerek dep oılaımyn», - degen QR Premer-Mınıstriniń orynbasary Eraly Toǵjanovtyń osy pikiri de jón. Biz endigi arada osy moratorıı jarııalanǵan 5 jyldyń ishinde jerimizdiń esebin túgendep, tııanaqtap, «anada mynsha jer bar eken» degendi jaı ǵana aıtpaı, kimde qansha jer bar ekenin ashyq jarııalap otyrsaq ta bolar edi.
Osy rette, ol árqaısymyz jerge ıe bolýdyń osy zamanǵy ádisi men tásilin jete meńgerip, jermen eńbek etý máselesine erekshe den qoıýmyz qajet ekenin aıtýda.
«Jerde eńbek etsek qana ol jerdiń ıesi bola alamyz. Sonymen birge memleket te endigi arada halyqtyń jerdi ıgerý máselesine de qatysty óz sheshimderin anyq ta aıqyn aıtýǵa tıisti. Qazaq jeri - birtutas ulttyń jeri. Eger de dál búgingideı aýyldarymyz qańyrap bos qalyp jatsa, jaılaýymyz malsyz qalsa, halqymyz óspeı jatsa, kóbimiz shet elde turýǵa umtylyp otyrsaq, árıne qazaq jeri kim kóringenniń kóz qurty bolyp qala bereri bar. Baıaǵy Bıaǵańnyń, Beıimbet Maılınniń «Gúldense aýyl, gúldenemiz bárimiz» degen uranyn qaıta kóteretin kez kelgen sııaqty. Sonymen birge eldiń birligi men tynyshtyǵyn saqtaý, Táýelsizdikti eń qasıetti jetistigimiz dep bilgenimiz de abzal. Jer tutastyǵy-Táýelsizdiktiń berik tuǵyry!», - tolyqtyrdy Jabal Erǵalıev.
