Jabal Erǵalıev: Elimizde medıtsınalyq gazet nemese jýrnal qajet
ASTANA. QazAqparat - QR Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasy talqylandy, dep habarlaıdy QazAqparat.
«Qazaq «Aýyryp em izdegenshe, aýyrmaıtyn jol izde» dep aıtady. Bizdiń halyq jalpy óziniń densaýlyǵyna ózi jaýapty ekenin áli sezinbeıdi. Óıtkeni sol densaýlyqqa jaýapty ekendigin sezinetindeı bizde aldyn alý sharalary júrgizilmeıdi. Sonyń bir aıqyn kórisine toqtalatyn bolsaq, Qazaqstanda birde-bir durys medıtsınalyq gazet nemese jýrnal joq», - dep toqtaldy senator Jabal Erǵalıev jobany talqylaý barysynda.
Ol óz sózinde oblystarda salaýatty ómir salty atty uıymdar bar ekenin, alaıda olardyń qyzmetin adamdar kóp jaǵdaıda bilmeıtinin jetkizdi.
«Ol uıymdar anda-sanda gazetterge biren-saran materıaldy berýmen ǵana shekteledi. Qazirgi kezde olardyń densaýlyq saqtaý men aýrýdyń aldyn alý jónindegi sharalary búkil halyqqa jetpeıdi. Jalpyhalyqtyq túsindirý jumystary bir izge salynbaı kele jatyr. Ekinshiden, ásirese aýyldy jerlerde áleýmettik medıtsınalyq saqtandyrý kezinde úlken túsinbeýshilikter týyndaýy múmkin. Osyny biz jergilikti jerlerde árbir turǵynǵa qalaı jetkizemiz? Qaıtip túsindiremiz?», -dedi J. Erǵalıev.
Onyń paıymynsha, zańnamany túsindirý baǵytynda jergilikti jerlerde únparaqtar men qajetti aqparattardy taratý jumystary qamtylýy qajet.
