Jahandyq jylynýdy 1,5 °C sheginde ustaý maqsatyna qaýip tóndi

ASTANA. KAZINFORM — Birikken Ulttar Uıymynyń Bas hatshysy Antonıý Gýterrısh jahandyq jylynýdy ındýstrııaǵa deıingi kezeńmen salystyrǵanda 1,5 °C sheginde ustaý maqsatyna qater tónip turǵanyn eskertti. Onyń aıtýynsha, eger elder parnıktik gaz shyǵaryndylaryn qysqartý boıynsha qosymsha sharalar qabyldamasa, álem quldyraý shegine jaqyndaýy múmkin, dep jazdy AZƏRTAC.

BUU-nyń klımat aptalyǵy men Bas Assambleıanyń kezekti sessııasy qarsańynda sóılegen sózinde Gýterrısh qazirgi ulttyq josparlar jetkiliksiz ekenin aıtty.

– Kóptegen ulttyq qujattar ekonomıkanyń barlyq sektorlaryn qamtymaıdy jáne shyǵaryndylardy tolyq qysqartýdy kózdemeıdi. Eger biz aldaǵy birneshe jylda emıssııany qysqartpasaq, jahandyq jylynýdy 1,5 °C sheginde ustaý múmkindigin joǵaltamyz, – dedi Bas hatshy.

2030–2035 jyldary 1,5 °C shegine jetý qaýpi 50 %

Klımattyń ózgerýi jónindegi úkimetaralyq sarapshylar tobynyń (IPCC) boljamy boıynsha, 2030–2035 jyldar aralyǵynda Jer betindegi temperatýra 1,5 °C deńgeıine jetý yqtımaldyǵy shamamen 50 %.

Ǵalymdar bul shekten azdaǵan aýytqý da:

• ekstremaldy aýa raıy qubylystarynyń kóbeıýine,

• aptap ystyq tolqyndarynyń jıileýine,

• bıologııalyq ártúrliliktiń joǵalýyna,

• ekojúıelerdiń tozýyna alyp keletinin eskertedi.

BUU iri ekonomıkalarǵa úndeý jasady

BUU Qytaı, Eýropalyq Odaq elderi jáne basqa da iri ekonomıkalarǵa ózderiniń klımattyq strategııalaryn jańartýdy jedeldetý qajettigin qaperge saldy.

Bul turǵyda negizgi kezeń BUU-nyń Klımattyń ózgerýi jónindegi negizdemelik konventsııasy taraptarynyń 30-konferentsııasy (COP30) bolmaq. Konferentsııa álemdik qaýymdastyqtyń klımattyq mindettemelerin oryndaýǵa nazaryn aýdarýy tıis.

Aıta keteıik, búgin Bas Assambleıada BUU-nyń 80 jyldyǵyna arnalǵan saltanatty jıyn ótti.