Jahandyq jáne óńirlik tótenshe jaǵdaı: turaqty respýblıkalyq jedel shtab qurylyp jatyr

ASTANA. KAZINFORM – Azamattyq qorǵaý salasynda jergilikti atqarýshy organdardyń ókilettikteri keńeıtilip jatyr. Bul týraly Májilistiń jalpy otyrysynda azamattyq qorǵaý týraly zań jobasyn talqylaý kezinde Tótenshe jaǵdaılar mınıstri Shyńǵys Árinov málim etti.

- Tótenshe jaǵdaılardyń aldyn alý men joıýdyń tıimdi júıesi úshin zań jobasynda birqatar qosymsha mehanızm kózdelgen. Máselen, jahandyq jáne óńirlik TJ kezinde turaqty jumys isteıtin Respýblıkalyq jedel shtab qurylýda. Onyń negizgi fýnktsııalary - tótenshe jaǵdaılar men olardyń saldaryn joıý jónindegi sharalardy ázirleý, ortalyq jáne jergilikti atqarýshy organdardyń qyzmetin úılestirý, sondaı-aq is-sharalardyń oryndalýyn baqylaý, - dedi Sh. Árinov.

Onyń aıtýynsha, sonymen qatar jergilikti atqarýshy organdardyń ókilettikteri keńeıtilýde. Bul obektilik masshtabtaǵy tótenshe jaǵdaılardy jarııalaýǵa qatysty.

- Dala órtterin sóndirý jergilikti atqarýshy organdardyń quzyretinde. Osyǵan baılanysty olarǵa dala órtterin sóndirýge qatysýshylardy materıaldyq-tehnıkalyq jaǵynan (JJM, tamaqtaný, medıtsınalyq kómek) qamtamasyz etý boıynsha fýnktsııalar beriledi. Sondaı-aq olarǵa halyqty tótenshe jaǵdaılar kezindegi alǵashqy is-qımyldarǵa úıretý úshin ortalyqtardy jartylaı jabdyqtaý júktelgen, - dedi mınıstr.

Budan buryn habarlanǵandaı, adamdar jappaı jınalatyn obektilerdi saqtandyrý júıesi engizilip jatyr.