Jahandyq turaqtylyq jasandy ıntellektini damytýdaǵy jaýapkershilikke táýeldi - Prezıdent
ASTANA. KAZINFORM - Memleket basshysy «ShYU plıýs» sammıtinde elimizdiń BUU Bas hatshysy Antonıý Gýterrıshtiń halyqaralyq quqyqty qorǵaýǵa qosqan úlesin joǵary baǵalaıtynyn jetkizdi, dep habarlaıdy Aqordanyń baspasóz qyzmeti.
Qasym-Jomart Toqaevtyń aıtýynsha, Bas hatshynyń bastamasymen qolǵa alynǵan reforma BUU-nyń ámbebap sıpatyn saqtap, ony anaǵurlym tıimdi, naqty nátıjeni kózdeıtin qurylymǵa aınaldyrýǵa tıis. Al ózgeristerdiń sátti órbýi saıası erik-jiger men Uıymǵa múshe memleketterdiń jaýapkershiligine baılanysty.
Budan bólek, Prezıdent orta derjavalardyń róli artyp kele jatqanyna aıryqsha nazar aýdardy.
– Mundaı elder túrli ortalyqtar arasyndaǵy dıalogqa jáne ujymdyq sheshimder ázirleýge yqpal ete alady. Olardyń ustanymdary men bastamalary jahandyq basqarý tetikterinde barynsha eskerilýge tıis. Qazaqstan bul úderiske belsene atsalysýǵa daıyn. Preventıvti dıplomatııany nyǵaıtpaı, Birikken Ulttar Uıymyn ınstıtýttyq turǵydan jańǵyrtý múmkin emes. Qaqtyǵystardyń aldyn alý jáne daý-damaıdy beıbit jolmen retteý mádenıetin qalyptastyrý úshin ujymdyq kúsh-jiger kerek. Osy baǵdardy basshylyqqa alǵan Qazaqstan bıyl shilde aıynda Qytaı Halyq Respýblıkasynyń bastamasyn qoldap, Medıatsııa jónindegi halyqaralyq uıym qurý týraly konventsııaǵa múshe boldy, – dedi Prezıdent.
Memleket basshysynyń aıtýynsha, jahandyq turaqtylyq jasandy ıntellektini damytý aıasyndaǵy jaýapkershilikke kóbirek táýeldi.
– Jasandy ıntellektiniń jasampaz áleýetin ashatyn, onyń baqylaýsyz qoldanysyna jol bermeıtin jáne tsıfrlyq alshaqtyqty qysqartatyn ámbebap erejeler qajet. Qazaqstannyń bastamasymen Almatyda BUU Azııa-Tynyq muhıty elderine arnalǵan ekonomıkalyq jáne áleýmettik komıssııanyń (ESKATO) Azııa-Tynyq muhıty tsıfrlyq sheshimder ortalyǵy qurylady. Ortalyq, eń aldymen, damýshy elderdiń ıgiligi úshin ozyq tájirıbelerdi keńinen taratýǵa septigin tıgizedi, – dedi Qasym-Jomart Toqaev.
Aıta keteıik, Qasym-Jomart Toqaev «ShYU plıýs» sammıtine qatysyp jatyr.
