Jahandyq turaqsyzdyqqa qaramastan Qazaqstan ekonomıkasy ósimin saqtaıdy
ASTANA. KAZINFORM — Qazaqstan ekonomıkasy aldaǵy eki jylda da ósim kórsetedi. Mundaı boljam Azııa damý bankiniń (ADB) Asian Development Outlook 2026 baıandamasynyń shilde aıyndaǵy jańartylǵan shyǵarylymynda jarııalandy. Bul týraly Kazinform agenttiginiń tilshisi habarlady.
ADB baǵalaýynsha, Qazaqstannyń jalpy ishki ónimi (JІÓ) 2026 jáne 2027 jyldary 4,5 paıyzǵa ósedi. Bank muny álemdik energetıka naryǵyndaǵy turaqsyzdyqqa, geosaıası shıelenistiń kúsheıýine jáne óńirdegi ekonomıkalyq ósimniń baıaýlap, ınflıatsııanyń artýyna qaramastan el ekonomıkasynyń turaqtylyǵymen baılanystyrady.
Baıandamada 2026 jyldyń birinshi toqsanynda Azııanyń damýshy elderindegi ekonomıkalyq belsendilik joǵary ishki suranystyń arqasynda turaqty deńgeıde saqtalǵany aıtylǵan. Bul rette energııa tasymaldaýshylar baǵasynyń qymbattaýy men Taıaý Shyǵystaǵy shıeleniske baılanysty jetkizý tizbegine túsip otyrǵan qysym áli de jalǵasyp otyr.
Sonymen qatar, ADB Qazaqstandaǵy ınflıatsııa aldaǵy jyldary birtindep tómendeıdi dep boljaıdy. Bank dereginshe, tutyný baǵalarynyń ósimi 2026 jyly 10,4 paıyz bolsa, 2027 jyly 9,5 paıyzǵa deıin tómendeıdi.
Sonymen birge, Azııa damý banki Azııa men Tynyq muhıty óńirindegi damýshy elderge qatysty ekonomıkalyq ósim boljamyn 2026 jylǵa 4,9 paıyzǵa deıin tómendetti. Soǵan qaramastan, óńir ekonomıkasynyń ósýine ishki suranystyń turaqtylyǵy qoldaý kórsetip otyrǵany jáne energetıkalyq daǵdarystyń sharyqtaý kezeńinen keıin iskerlik belsendilik birtindep qalpyna kele bastaǵany atap ótilgen.
Bank mamandary óńir ekonomıkasyna tónetin negizgi qaýip-qaterler qatarynda geosaıası shıelenistiń kúsheıýin, álemdik qarjy jaǵdaıynyń qataıýyn, shıkizat baǵasynyń qymbattaýyn jáne jahandyq saýdadaǵy belgisizdiktiń saqtalýyn atady.
Qazaqstan ekonomıkasy 2026 jyldyń birinshi toqsanynda 4,2 paıyzǵa ósken.
Sońǵy bes jylda Transkaspıı baǵytymen júk tasymaly 3,5 esege artty.
