Jahandyq ekologııalyq modelge kóshý teńgerimdi ári yntalandyrýshy sıpatta órbýge tıis - Toqaev
ASTANA. KAZINFORM – Jahandyq ekologııalyq modelge kóshý teńgerimdi ári yntalandyrýshy sıpatta órbýge tıis. Bul týraly Óńirlik ekologııalyq sammıtte Memleket basshysy Qasym-Jomart Toqaev aıtty.
– Meniń oıymsha, ekologııa máselesinde tańdaýlylarǵa basymdyq berý ábestik. Kóp jaǵdaıda ekologııalyq kún tártibin ázirleý nemese qalyptastyrý barysynda túrli aımaqtar men elderdiń, ásirese, ekonomıkalyq áleýetin nyǵaıtýǵa den qoıǵan damýshy memleketterdiń qajettilikteri múldem eskerilmeıdi. Alaıda damyǵan elder qazirgi ekologııalyq standarttarǵa ındýstrııalandyrýdyń uzaqqa sozylǵan úderisiniń nátıjesinde jetkenin esten shyǵarmaıyq, - dedi Memleket basshysy.
Sondyqtan Prezıdent jahandyq ekologııalyq modelge kóshý úrdisi ádil, teńgerimdi jáne yntalandyrýshy sıpatta órbýge tıis ekenin basa aıtty.
- Barshamyz aqylǵa qonymdy, muqııat oılastyrylǵan pragmatıkalyq tásilge júginýimiz kerek. Sonda ǵana memleketter ornyqty damý qaǵıdattaryna saı alǵa jyljyp, óziniń ekonomıkalyq ósimi men progresine qaýip tóndirmeıdi. Qorshaǵan ortany qorǵaý salasyndaǵy yntymaqtastyq bizdi bólmeı, kerisinshe bir maqsatqa biriktirýge tıis. Eshkim bir-birin jarııa túrde aıyptamaýy, ózgeden min izdemeýi qajet. Beıbitshilik pen ornyqty damýǵa múddeli seriktester retinde jaýapkershilikti sezinip, naqty áreket etkenimiz durys, - dedi Qasym-Jomart Toqaev.
Aıta keteıik, birneshe eldiń Prezıdenti qatysyp jatqan Óńirlik ekologııalyq sammıt «Ornyqty bolashaqqa ortaq kózqaras» taqyrybymen ótip jatyr.
