Jahandyq ekologııalyq apattardyń qalaı aldyn alýǵa bolady
ASTANA. KAZINFORM – Jahandyq klımattyq jáne ekologııalyq máseleler álemdegi barlyq memlekettiń, halyqaralyq uıymdardyń, sondaı-aq bıznes ókilderi jáne sarapshylar qaýymdastyǵynyń birlesken ózara is-qımyly nátıjesinde ǵana sheshiledi. Bul jóninde Óńirlik ekologııalyq sammıttiń kýlýarynda is-shara moderatory Sharlotta Kan málimdedi.
– Klımattyń ózgerýin jalǵyz memleket toqtata almaıdy. Máselen, aýaǵa taraǵan kómirqyshqyl gazy úshin shekara joq, ol bir orynda turmaıdy. Sondyqtan tabıǵatty qorǵaý maqsatynda barlyq el jumylyp, jahandyq jáne aımaqtyq deńgeıdegi birlesken ári uzaq merzimdi sheshimderdi qarastyrýy kerek, - dedi ol.
Sondaı-aq, sarapshy Orta Azııadaǵy taǵy bir asa ózekti taqyrypqa toqtaldy.
– Atalǵan aımaqta aýa lastanýynan bólek, sý resýrstarynyń tapshylyǵy ýshyǵyp tur. Bul máseleni aımaqtaǵy elder ózara dıalog, senim jáne naqty kelisimsharttardy oryndaý arqyly ǵana sheshe alady, - dedi ol.
Budan bólek, moderator Aral teńiziniń tartylǵany tárizdi ekologııalyq apattardyń aldyn alý qajettigin jetkizdi.
– Endi qol qýsyryp, kútip otyratyn ýaqyt joq. Úkimetter, agrarlyq sektor, jeke bıznes, startaptar, halyqaralyq uıymdar, ǵylymı qaýymdastyqtar – bári-bári qorshaǵan ortany qorǵaý maqsatynda birigýi tıis. Sonda ǵana naqty júzege asatyn ári turaqty sheshimderdi qabyldaýǵa bolady, - dedi ol.
Sharlotta Kan Astanadaǵy ekologııalyq sammıtten úmiti zor ekenin aıtady.
– Bul jıynǵa qatysý – men úshin mártebe. Orta Azııa memleketteri san alýandyǵyna qaramastan, ortaq bolashaq úshin birigýge daıyn ekenin kórsetip otyr. Bul sammıt jańa ortaq bastamalar men naqty sheshimderge jol ashatynyna senemin, - dedi ol.
Aıta keteıik, buǵan deıin Astanaǵa tórt memleket basshysy ekologııalyq sammıtke qatysýǵa kelgenin jazǵanbyz.
