«J. Táshenevtiń azamattyq erligi jáne qazirgi patrıottyq tárbıe» atty jınaq jaryqqa shyqty
ASTANA. 20 naýryz. QazAqparat - Astanadaǵy QR Ulttyq akademııalyq kitaphanasynda «Jumabek Táshenevtiń azamattyq erligi jáne qazirgi patrıottyq tárbıe» atty respýblıkalyq ǵylymı-praktıkalyq konferentsııa materıaldarynyń negizinde jaryqqa shyqqan jınaqtyń tusaýkeseri ótti.
Sol dáýirdegi saıasattyń salqynynan qoryqpaı, qarsylyq kórsetip, qazaqtyń jerin saqtap qalǵan tulǵa - Jumabek Ahmetuly Táshenev. Onyń týǵan halqynyń aldyndaǵy úlken erliginiń biri - surapyl hrýşevtik dáýrende Qazaqstannyń soltústik aımaǵyndaǵy baılyǵy shalqyǵan, egin-jaıy tolqyǵan bes oblysyn kórshi Reseıge qosýdan aman alyp qalýy der edik. Qazaqtyń ulan-ǵaıyr kıeli jerin talan-tarajdan qorǵap qalǵan J. Tashenevti halyq arasynda «Kisendeýli jolbarys» dep atap ketken.
Jumabek Táshenev halqyna adal, el ıgiligi jolynda asqan jaýapkershilikpen eńbek etken qaıratker tulǵa bolatyn.
«Endi úsh jyldan soń Jumekeńniń týǵanyna 100 tolady. Búgingi kezdesýdiń maqsaty - halqymyzdyń asyl perzentiniń beınesin aıshyqtaı túsý jáne aldaǵy J. Táshenevtiń mereıtoıyna baılanysty túrli sharalardy belgileý», - deıdi uıymdastyrýshylar.
Jumabek Táshenev 1915 jyly 20 naýryzda Aqmola oblysynyń Arshaly aýdanyndaǵy Tanagúl aýylynda dúnıege kelgen. 1928‑1933 jyldary jergilikti Sharýashylyq jastar mektebinde oqyǵan. 1934‑1939 jyldar aralyǵynda Aqmola, Aqmola oblysy Vıshnev, Qaraǵandy oblysy Nura jáne Soltústik Qazaqstan oblysy Sovettik, Beınetkor aýdandyq atqarý komıtetterinde jaýapty hatshysy bolyp istedi. Kóp jyldar boıy Soltústik Qazaqstan jáne Aqtóbe oblystarynda partııa komıtetiniń hatshylyǵynda qyzmet atqardy. Oblysta jaqsy qyzmet istep, joǵary kórsetkishterge jetken J. Táshenevti halyq 1955 jyly Qazaq KSR Joǵarǵy Keńesi Prezıdıýmynyń tóraǵasy qyzmetine saılady. Munan bes jyl ótkennen keıin laıyqty basshysy bolyp sanalǵan 45 jastaǵy Táshenev 1960 jyly qańtar aıynda Qazaq KSSR Mınıstrler Keńesi tóraǵasyna taǵaıyndaldy.
Bul qyzmetten 1961 jyly qantar aıynda bosatylǵan soń, bes aı jumyssyz otyrǵyzyp, keıin Shymkent oblystyq atqarý komıteti tóraǵasynyń qatardaǵy orynbasary qyzmetine, ıaǵnı qıturqy saıasattyń kesirinen kóp tómendetildi. Sodan Jumabek Táshenevtiń alpys jasqa jetkennin kútkendeı, ony 1975 jyly naýryz aıynda memlekettik qyzmetten shuǵyl, eńbegi sińgen derbes zeınetkerlikke jiberilgen. El aǵasy bolyp tanylyp, halyq qurmetine bólendi. Janqııarlyq eńbegi úshin Lenın ordenimen, Eńbek Qyzyl Tý jáne «Qurmet Belgisi» ordenderimen nagradtalǵan. Soqtyqpaly soqpaqsyz ómir jolyn bastan keshirgen aıaýly azamat 1986 jyly qarashanyń 18 kúni 71 jasynda dúnıeden ótti.
