J.Nurkenov Aqmola oblysy ákimi apparatynyń basshysy bolyp taǵaıyndaldy

ASTANA. QazAqparat - Oblys ákimi Sergeı Kýlagınniń ókimimen , QR Prezıdenti Ákimshiliginiń kelisimi boıynsha Jomart Jumaǵalıuly Nurkenov rotatsııa sheńberinde Aqmola oblysy ákimi apparatynyń basshysy bolyp taǵaıyndaldy, dep habarlaıdy oblys ákimdiginiń baspasóz qyzmeti.

Jomart Jumaǵalıuly 1974 jyly týǵan, bilimi joǵary, Aqmola agrarlyq ýnıversıtetin mal dárigeri mamandyǵy boıynsha, Sh.Ýálıhanov atyndaǵy Kókshetaý memlekettik ýnıversıtetin ekonomıka bakalavry mamandyǵy boıynsha bitirgen.
Eńbek jolyn 1996 jyly «Konstantınovskıı» ÓK mal dárigeri bolyp  bastady. 1998 jylǵy qarashadan bastap Qazaqstan Respýblıkasy Aýyl sharýashylyǵy mınıstrligi Tselınograd aýdandyq aýmaqtyq basqarmasynda basshy laýazymdardy atqardy.
2002 jylǵy sáýirde Qazaqstan Respýblıkasy Aýyl sharýashylyǵy mınıstrligi Aqmola oblystyq aýmaqtyq basqarmasynyń bólim bastyǵy laýazymyna aýysty. Qazaqstan Respýblıkasy Aýyl sharýashylyǵy mınıstrligi Aqmola oblystyq aýmaqtyq basqarmasy bastyǵynyń orynbasary, bastyǵy laýazymdaryn atqardy.
2012 jylǵy aqpannan bastap 2013 jylǵy maýsym aralyǵynda Aqmola oblysy aýyl sharýashylyǵy basqarmasynyń bastyǵy qyzmetinde boldy.
2013 jylǵy maýsymnan Atbasar aýdanynyń ákimi, 2014 jylǵy maýsymnan - Arshaly aýdanynyń ákimi laýazymdaryn atqardy.