Ekonomıst QQS salynatyn aınalymnyń tómengi shegin 15 mln teńge etý ne úshin kerek ekenin túsindirdi

ASTANA. KAZINFORM — Ekonomıst, «QazMunaıGaz» AQ tóraǵasynyń keńesshisi Jaqsybek Qulekeev qosylǵan qun salyǵyn salýdyń aınalym shegin azaıtý máselesi týraly pikir bildirdi.

Sarapshy óz paıymyn ózi Úkimet múshesi bolyp jumys istegen kezben baılanystyryp túsindirdi.

— Biz kezinde jeke kásipkerlerdiń jumysyn zańdastyrǵanda birneshe mıllıon ózin-ózi jumyspen qamtyǵan azamattar boldy. Olardyń ne istep júrgenin bilmedik. Sondyqtan jumystaryn zańdastyrý úshin «jeke kásipkerlik» degen uǵymdy engizip, meılinshe jaǵdaı jasadyq. Tabysynan 3 paıyz salyq tólese, zańdy bıznes sýbektisi bolyp esepteledi dedik.
Ókinishke qaraı, qazir 2,4 mln jeke kásipkerdiń 400 myńǵa jeter-jetpesi ǵana salyq tóleıdi. Qalǵan 2 mıllıonnan astamy tólemeıdi. Olardyń ishinde tabysy barlar kóp qoı. Qazir zań júzinde solarǵa beriletin úlken jeńildikti úlken kásiporyndar da paıdalanyp júr, — dedi ol Májiliste dóńgelek ústel kýlýarynda.

Ekonomıst eldegi alpaýyt kompanııalar ózine qyzmet kórsetetin jeke kásipkerlerge berilgen salyq jeńildikterin óz salyǵynan jaltarýǵa paıdalanýy múmkin ekenin aıty. 

— Bizdegi eń úlken problema mynada. Bıznes sýbektileriniń bir tobyna úlken jeńildik bersek, qalǵan sýbektiler de sol jeńildikti paıdalanýdyń jolyn izdeıdi. Onyń múmkindikteri óte kóp. Qazir Qazaqstandaǵy eń úlken kompanııalardyń aınalasynda solarmen jumys istep júrgen myńdaǵan jeke kásipker bar. Sol kásipkerlerge aýdarady, olar 3 paıyz salyq tóleıdi. Tipti tólemeýi de múmkin. Osylaısha ana aqshanyń bárin eshqandaı salyqsyz paıdalanýǵa bolady. Sondyqtan osy máseleni retteý kerek. Men óz sózimde keıbir bıznes ókilderine salyq tólemeýge ózimiz jaǵdaı jasap qoıǵanymyzdy aıttym. Óıtkeni jeke kásipkerlerge qazir eshqandaı mindetteme joq. Mıllıondaǵan tabys taýyp jatýy múmkin. Biraq bir tıynyn da memleketpen bólispeıdi. Onyń bári osy memlekettegi jasalyp jatqan ıgiliktiń bárin kórip otyr, — dedi Jaqsybek Qulekeev.

Eske salsaq, 20 aqpanda Májiliske Salyq kodeksiniń túzetilgen jobasy engizilgen edi. Búgin sol qujatty pysyqtaıtyn Májilistiń jumys toby iske kiristi. 

Kodekstiń jańa redaktsııasyndaǵy negizgi túzetýler mynalar:

➤ Qosylǵan qun salyǵy boıynsha mindetti tirkeý shegin tómendetý — 20 000 MRP (78,6 mln teńge) 3 800 MRP (15 mln teńge) deıin;

➤ Qosylǵan qun salyǵynyń mólsherlemesin arttyrý — 12%-dan 16%-ǵa deıin, buǵan qosa birqatar salalar úshin tómendetilgen mólsherleme 10% belgilenedi;

➤ Jeńildetilgen deklaratsııa boıynsha arnaıy salyq rejımin qoldanýdy shekteý — tek B2C segmentine (bıznes túpkilikti tutynýshylar úshin) qoljetimdi bolady.