J.Dosqalıevke qatysty qylmystyq iske onyń Medıtsına akademııasyna basshylyq jasaǵan kezdegi zań buzýshylyqtary negiz bolyp otyr

Bul týraly búgin elordada ótken baspasóz máslıhaty barysynda QR Ekonomıkalyq jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.

«Aǵymdaǵy jylǵy qyrkúıektiń 21-inde agenttikpen QR Densaýlyq saqtaý mınıstri Jaqsylyq Dosqalıevke qatysty qyzmettik ókilettigin asyra paıdalaný faktisi boıynsha qylmystyq is qozǵaldy. Qylmystyq istiń qozǵalýyna kelip túsken jáne qylmystyq is júrgizý zańnamasyna sáıkes tirkelgen jedel aqparat boıynsha tekserý materıaly negiz boldy», dedi Murat Jumanbaı óz sózinde.

Resmı ókildiń atap ótýinshe, tergeý barysynda 2003 jyly Qazaq memlekettik medıtsına akademııasyna jalpy kólemi 2,5 gektar jer telimi bólingendigi anyqtalǵan. Al 2005 jáne 2006 jyldary aralyǵynda atalǵan bilim ordasynyń basshysy qyzmetin atqarǵan J.Dosqalıev paıdakúnemdik nıetpen ári jeke materıaldyq paıda alý úshin zańnamany buza otyryp, óziniń tanysy, «Astana KBT» JShS-niń dırektory Kenjınniń paıdasyna onymen jer telimderinde 2 turǵyn úı salýǵa kelisimshartqa otyrǵan. Dosqalıev bergen bas senimhat boıynsha Kenjın salynǵan úılerdegi páterlerdi naryqtyq baǵamen akademııaǵa qatysy joq jeke tulǵalarǵa satyp, 1,4 mıllıard teńge tabysqa kenelgen. «Shyn máninde jer telimderi Astana medıtsınalyq ýnıversıteti AQ-ynyń oqytýshylaryna turǵyn úı salýǵa bólingen bolatyn. Dosqalıev Kenjınnen turǵyn úıler salynǵan jer telimderin bergendigi úshin sol úılerden zańsyz syıaqy retinde týysqandaryna tirkelgen 2 páterdi jáne óz atyna tirkelgen Qaraótkel kentindegi kottedjdi alǵan», dedi ol óz sózinde.