J.Asanov prokýrorlardy bıznestiń qutyn qashyrmaýǵa shaqyrdy
«Maýsymda «Atameken» palatasymen birge forým ótkizdik. Ózekti máselelerdi ashyq aıttyq. Tutas bir problemalardyń betin ashyp, memlekettik organdar tarapynan jasalatyn qysymdy sóz ettik. Jol kartasyn jasap, Astana men Aqmola oblysyndaǵy 560 isti zerttep shyqtyq. Árbir besinshisi zańsyzdyqtarǵa toly. Qylmystyq-protsessýaldyq kodeks aıasynda 224 kásiporynǵa tekserister taǵaıyndaldy. Jartysynan astamy - sebepsiz tekserýler. Biz de ony nazardan tys qaldyryp aldyq», - dedi ol búgin Bas prokýratýranyń jartyjyldyń qorytyndysyn shyǵarý kezinde.
Sonymen qatar, onyń aıtýyna qaraǵanda, byltyrǵy jylmen salystyrǵanda, bıyl qylmystardyń sany azdap tómendegen. Kisi óltirý men urlyq-qarlyq 12 paıyzǵa kemigen. Buzaqylyq pen zorlaý faktileri úshten birge deıin qysqarǵan.
«Qylmystyq-pretsessýaldyq kodeksti jańarttyq. Barlyǵyn tirkeımiz, aryzdardyń barlyǵy jasyrýsyz tirkeledi. Ne aldyq? Ekinshi máselege tap boldyq, barlyq isterdiń úshten biri, ıaǵnı 88 myń is toqtatylǵan. Onda bastapqy kezden qylmys bolmaǵany anyqtaldy. Biraq sol úshin quqyq qorǵaý organdary jaýap alý úshin kásipkerlerdi ary-beri sergeldeńge salady. Odan qaldy tintý júrgizedi. Bul bir kún, eki kúndik sharýa emes, aılap ýaqyttaryn alady. Adamdar qınalady, bıznesteriniń astań-kesteńi shyǵady. Bir jaǵynan ózimizge de kóp jumys taýyp berdik. Mańyzdy istermen aınalysýdyń ornyna bos jumystarmen aınalysyp jatyrmyz. Buny qalaı túzeımiz?», - dep atap ótti J.Asanov.
Bul qalyptasqan máseleni sheshý úshin Bas prokýror birqatar sharalardy usyndy.
«Sotqa deıingi tergeý reestrine tirkeýdiń algorıtmin jáne naqty krıterıılerin anyqtaý qajet. Bastysy - qısynsyz qylmystyq isterdi boldyrmaý, tergeýdiń oıǵa qonymdy merzimderin engizý. Naqtylyq joq. Osynyń kesirinen eń jeńil isterdiń ózi aılarǵa sozylyp jatady», - dep atap ótti ol.
J.Asanov bul máseleni óziniń orynbasaryna birjaqty qylýdy tapsyrdy.
