J.Asanov prokýratýraǵa jumysqa qabyldaýdyń jańa sharttaryn atady

ASTANA. QazAqparat - Prokýratýraǵa jumysqa qabyldaýdyń jańa sharttary bekitildi. Bul týraly búgin «Prokýratýraǵa úzdik kadrlar!» dep atalatyn dóńgelek ústel barysynda QR Bas prokýrory Jaqyp Asanov málim etti.

«Jumysqa qabyldaý protsesi eki kezeńnen turady. Bastapqyda irikteý, odan keıin konkýrs ótkiziledi. Іrikteý kezeńinde kandıdat zań boıynsha test tapsyryp, medıtsınalyq jáne arnaıy tekserýden ótedi. Ekinshi kezeńde suhbattasý men taǵylymdama oryn alady. Taǵylymdama 10 kúnge sozylady. Dál osy taǵylymdama kezinde biz jańashyldyqtar engizemiz»,-  dedi ol.

Onyń atap ótýinshe, kandıdat óz erkimen 4 tapsyrmany oryndaýy tıis. Atap aıtqanda, óziniń ómirlik tájirıbesin sıpattap, esse jazýy, keıstik tapsyrmalardy sheshýi jáne psıhologııalyq zertteýden ótýi tıis. Bul rette taǵylymdamadan ótýshige ómirlik tájirıbesi týraly 500 sóz jazýǵa 1 saǵat, 500 sózden turatyn shaǵyn esse jazýǵa 2 saǵat, al 100 suraqtan turatyn psıhologııalyq test tapsyrýǵa 1,5 saǵat beriledi.

«Bizge ómirlik tájirıbe men esse jazýdy jáne keısterdi oryndaýdy baǵalaýǵa Nazarbaev Ýnıversıtetiń, PraısÝoterHaýs pen Delloıt sarapshylary kómek kórsetýge daıyn. Sonymen qatar ol kandıdattyń psıhologııalyq portretin de beredi», - dedi Bas prokýror.

J.Asanovtyń aıtýynsha, kandıdattyń barlyq jumysy qupııa saqtalady. Buǵan qosa, kandıdat ózin kim baǵalaǵanyn, al sarapshylar kimniń jumysyn baǵalap jatqandyǵyn bilmeıdi. «Mundaı táýelsiz baǵalaý jumysqa qabyldaý barysynda mindetti bolady», - dedi ol.