J. Amanqulovtyń «Kóshpendi fotograftyń shejiresi» atty jeke kórmesi ótýde
ASTANA. 6 jeltoqsan. QazAqparat - Búgin Astanada ataqty fotograf Janarbek Amanqulovtyń jeke kórmesi saltanatty túrde ashyldy. Táýelsizdiktiń 21 jyldyǵy aıasynda Astana jurtshylyǵy men qonaqtaryna arnalǵan shara «Kóshpendi fotograftyń shejiresi» atalyp otyr.
J. Amanqulov foto-óner stılin jáne basqa da janrlardy qatar ala júrip, óz eńbek jolyn foto-tilshi qyzmetinen bastaǵan mádenıet qaıratkeri. Jeke talǵamyn qalyptasyrý jolynda ol Erevanda, Parıjde turǵan. Sol jerlerden alǵan, jınaqtaǵan mol tájirıbesi ortaazııalyq fototilshiniń jańa baǵytta damýyna sep bolǵanǵa uqsaıdy. Fotograftyń kóptegen shyǵarmalary qazirgi Qazaqstannyń eki jaqty shynaıy beınesin kórsetedi. Onyń biri - Dala kóshpeli mádenıetinen tamyr alsa, ekinshisi qazirgi zamanǵy ómirdiń qýanyshy men muńyn toptastyrar beıneler. Al onyń túsirilimderi jalpy mádenı murany da, jeke oıdyń paıymdaýlarynyń da ońtaıly sátterin qamtıdy.
Qazirgi tańda ózin derekti jáne kórkem fılmdermen qatar ózge de janrlarda tanyta bilgen J.Amanqulov Ortalyq Azııanyń jarqyn fotograftarynyń biri retinde tanymal. Onyń týyndylary Eýropa men AQSh-tyń da talǵampaz jurtyna da keńinen tanys. Onyń sýretteri Forbes, Esquire, Harper"s Bazaar sekildi álemge bedeldi basylymdarda jaryq kórgen.
Al «Kóshpendi fotograftyń shejiresi» úsh bólimnen turady. Onyń birinde avtordyń álemniń ártúrli elderin saıahattap júrgende túsirgen sýretteri qoıylyp, onda kári qurlyq Eýropanyń yrǵaqty ómiri Qazaqstandaǵy jáne jalpy Azııadaǵy túbegeıli ózgeristermen birge salystyrmaly túrde kórsetiledi. Al ekinshi bólim portrettik toptamalarǵa arnalǵan. Al úshinshi bólim - jıhangez jannyń turaǵy sanalar kıiz úımen astarlap beınelengen. Bul toptamany elimizdiń ár óńirinde túsirgen sýretshi máńgilik Uly dala jáne Kók aspanmen taǵy bir tildesken syńaıly. Sol arqyly ózin mazalaǵan san saýalǵa jaýap izdep, qazaq eliniń yqylym pálsapalyq ómiri jaıly kózqarastaryn tujyrymdaıdy.
