J.Ábdildın: Jaqsylyq, izgilik pen kisilik qasıetterin kitaptan taptym
ASTANA.QazAqparat - Búgin Astana qalasynda birinshi ret ótip jatqan kitap festıvalinde ǵalym, fılosofııa ǵylymynyń doktory, professor, Qazaqstan Respýblıkasy Ulttyq ǵylym akademııasynyń akademıgi, Qazaqstandaǵy dıalektıkalyq logıka mektebiniń negizin salýshy Jabaıhan Ábdildın aǵamyzdy kezdestirip, az-kem pikirlestik.
Akademık aldymen kitap oqýdy jaqsy kóretin oqyrmandardy ashyq aspan astynda ótip jatqan kitap merekesimen quttyqtady. «Keleshegin oılaıtyn adamzattyń aqylshysy - kitap»,-deıdi ǵalym. «Búgingi festıvalge baılanysty, qazaq halqyn, onyń ishinde, kitap oqdy jaqsy kóretin qaýymdy bar nıettimmen kitap merekesimen quttyqtaımyn! Meniń oıymsha, kitap - óte qasıetti dúnıe. Ár adam boıyna sińgen rýhanı baılyqty, asqaq armandy, keleshekke degen kózqarasyn kitaptan alady. Men ózim kitapty qatty súıetin adammyn. Meniń boıymda bir jaqsylyq, izgilik, patrıottyq, kisilik bolatyn bolsa, osynyń barlyǵyn kitaptan aldym. Kitap - ǵajaıyp dúnıe. Kitap arqyly keremet ǵulamalarmen sóılesesiń, suhbattasasyń. Kitap arqyly Sokratpen, Shekspırmen, Getemen, Pýshkınmen, Abaımen, Shoqanmen tildesip, sóıleskendeı bolasyń. Sondyqtan da, ár adam óz keleshegin oılaıtyn bolsa, ol kitappen dos bolýy kerek. Dúnıeniń bári ótpeli bolǵanmen, máńgilik oı, rýhanı dúnıe kitapta jatyr»,-deıdi J.Ábdildın. Al, Abaı men Shoqandaı qazaq ádebıetindegi klassıkterdiń mereıtoılaryna toqtalǵan ǵalym Abaıdyń ár kitaby qoıyn dápterdeı keýde tusymyzda júrý kerek degen oıyn aıtty. «Bıyl - Qazaq handyǵynyń 550 jyldyǵy, Abaıdyń 170 jyldyǵy, Shoqannyń 180 jyldyǵy. Bul merekelerdiń bir jylǵa dál kelýi de beker emes shyǵar. Búgingi kitap toıyna baılanysty árbir jas Abaıdy oqyp, Abaıdy túsinse...Men mysaly, Abaıdy ómir boıy oqydym. Boıyńda aqylyń qansha bolsa, Abaıdy sonshalyqty jańa kózqaraspen túsinesiń. Abaı - kóne qubylys emes, bizdiń keleshekke, búgingi ómirimizge óte kerek qubylys. Abaıdyń kitaptaryn qoıyn dápter sııaqty qolymyzdan tastamaýymyz kerek»,-dep aqyl qosty akademık. Onyń ústine, ǵalym myna órkenıettiń eshbir dúnıesi kitapty almastyra almaıtynyn aıtyp, kitapty súıýge shaqyrdy. «Taǵy da aıtaıyn degenim, kitapty súıe bilý kerek. Teledıdar, ǵalamtor, búgingi keremet tehnıkalyq jetistikterdiń eshqaısysy kitapty almastyra almaıdy. Ary ketse, olar kitaptyń tek qosymshasy ǵana...»,-dep oıyn qorytty fılosof.
