Zeınolla Samashev: Kóneniń jumbaǵy Bereldiń qoınaýynda
Bul týraly QR Mádenıet jáne sport mınıstrliginiń janyndaǵy «Qasıetti Qazaqstan» ǵylymı-zertteý ortalyǵynan habarlady.
Eske sala ketsek, búgin «Qasıetti Qazaqstan» ǵylymı-zertteý ortalyǵynyń jetekshisi Berik Ábdiǵalı «Rýhanı jańǵyrý» baǵdarlamasyn júzege asyrý maqsatynda Qazaqstannyń kıeli jerlerin anyqtaý jumysy júrgizilip jatqanyn málimdegen bolatyn. Búgingi kúnge deıin elimizde jalpyulttyq deńgeıdegi 100 jáne jergilikti mańyzy bar 500 kıeli oryn tańdalyp alynyp, olar arnaıy tizim jobasyna engizilgen.
Qasıetti oryndardyń tiziminiń ishinde Shyǵys Qazaqstan oblysy Qatonqaraǵaı aýdanyndaǵy Berel qorymy da enip otyr. Tarıh ǵylymdarynyń doktory, professor Zeınolla Samashevtyń aıtýynsha, Bereldiń zerttelip jatqanyna 19 jyldaı ýaqyt bolyp qalǵan.
«Berel bizdiń zamanymyzǵa deıingi ІV ǵasyr kezeńin qamtyp, sol kezeńdegi ata-babalarymyzdyń tarıhy, mádenıeti týraly derekterden aqparat beretin birden-bir eskertkish bolyp tabylady. Bizdiń ata-babalarymyz qalaı ómir súrdi, kórshilerimen qandaı qarym-qatynas jasady, qandaı ekonomıkalyq baılanys ornatty? Sondaı suraqtardyń jaýabyn sheshýde Berel óte qundy eskertkish. Kóne óner turǵysynan alyp qaraǵanda Berelden tabylyp jatqan qundylyqtardyń bizdiń qazirgi zamannyń tarıhy úshin mańyzy óte zor. Sondaǵy kóne ónerdiń obrazdary, olardyń qazaq ónerimenen tarıhı sabaqtastyǵy bar. Sonymen birge, kóne zaman qundylyqtaryn qazirgi mádenı keńistikke ıntegratsııalaý máselesi jolǵa durys qoıylyp kele jatyr. Osy rette Berel qorymynyń kórseteri bar. Berel mýzeıi ashyldy. Osy mýzeımen biz aýqymdy mádenıetimizdiń túpnusqalaryn dáriptep, kórsete alamyz», - deıdi Zeınolla Samashev.