Zeınolla Alshymbaevtyń «Amanat arqalaǵan jyldar» atty qos tomdyǵy jaryq kórdi

ASTANA. QazAqparat - Astana qalasyndaǵy «Folıant» baspasy belgili qoǵam qaıratkeri, Qazaqstan Respýblıkasy Parlamenti Májilisiniń úshinshi jáne tórtinshi shaqyrylymdarynyń depýtaty Zeınolla Alshymbaevtyń «Amanat arqalaǵan jyldar» atty qos tomdyǵyn jaryqqa shyǵardy.

Avtordyń 35 baspa tabaqtan turatyn birinshi kitabynda merzimdi baspasóz betinde jarııalanǵan ózekti maqalalary, jýrnalısterge bergen suhbattary, ónegeli ómirimen úlgi bola bilgen aǵa-zamandastary týraly jazǵan estelikteri, Úkimet basshylary men mınıstrlikterge joldaǵan usynystary men depýtattyq saýaldary jáne oǵan alǵan jaýaptary toptastyrylǵan.

Saılaýshylar amanatyn oryndaǵan halyq qalaýlysynyń jumys uıymdastyrý stılin, onyń qyr-syryn ashyq kórsetetin bul jınaq ár deńgeıdegi halyq ókilderi, onyń ishinde jas saıasatkerler men tulǵatanýshylar úshin tanymdyq mańyzy joǵary ekeni jáne úlken qyzýǵyshylyq týǵyzary sózsiz.

Al 32 baspa tabaqtan turatyn ekinshi kitapta zamandastar lebizi, avtordyń qoǵam men ómir týraly oılary kórinis tapqan.

Avtor óz kitabynyń «Halyq senimi - el ıgiligine» atty birinshi bólimin Memleket basshysy Nursultan Nazarbaevtyń: «Halyq daýsyn sizderge berdi. Demek, el úmitin aqtaý, halyq amanatyna adal, senimge saı bolý - sizderdiń azamattyq paryzdaryńyz», - dep depýtattarǵa aıtqan sózimen bastaǵan.

Al «Ómirden - oı, tirlikten - túıin» atty bóliminde «Zań bıliktegilerden bıik bolyp, bıliktegiler zańnyń quly bolǵan el - Qudaıdyń meıirimi túsken el» degen Platonnyń sózin keltirgen. Sondaı-aq qazaq jazýshysy Júsipbek Aımaýytovtyń: «Zań adam paıdasyna jazylady, adam zań úshin týmaıdy» degen tolǵaqty oıy da osy kitaptyń mán-maǵynasyn asha túsken.

San alýan ekonomıkalyq, saıası-áleýmettik taqyryptardy qamtıtyn bul eńbek qalyń oqyrman qaýymǵa arnalǵan.