Zeınetkerlerge poıyzdarǵa 25% jeńildik berildi

ASTANA. KAZINFORM –  «Jolaýshylar tasymaly» AQ 60 jastan asqan jolaýshylarǵa arnalǵan jańa jeńildikti iske qosty. 

«Jolaýshylar tasymaly» AQ 60 jastan asqan jolaýshylarǵa arnalǵan jańa jeńildikti iske qosty.

Endi el ishinde temirjolmen saparlaýǵa 25% jeńildik qarastyrylǵan. Jeńildikti paıdalaný úshin Ulttyq tasymaldaýshynyń barlyq poıyzynda jaramdy QURMET dıskonttyq kartasyn rásimdeý jetkilikti.

Karta kýpe, platskart jáne otyratyn vagondarda oryn shekteýsiz bılet alýǵa múmkindik beredi.

Kartanyń quny — 3000 teńge, jaramdylyq merzimi — satyp alynǵan kúnnen bastap 1 jyl.

Jastar úshin de tıimdi múmkindikter usynatyn jańa KETTİK33 dıskonttyq kartasy engizildi. Endi 15 pen 25 jas aralyǵyndaǵy jolaýshylar KETTİK33 dıskonttyq kartasy arqyly kýpe vagondaryndaǵy joǵarǵy oryndar men otyratyn vagondarǵa bıletterdi 33% jeńildikpen rásimdeı alady. Kartanyń quny — 3000 teńge, jaramdylyq merzimi — satyp alynǵan kúnnen bastap 1 jyl.

Dıskonttyq kartalar ıesiniń atyna rásimdeledi jáne úshinshi tulǵalardyń paıdalanýyna jol berilmeıdi. Kartany tek temirjol vokzaldaryndaǵy «Jolaýshylar tasymaly» AQ bılet kassalarynan alýǵa bolady. Rásimdeý úshin jeke kýálik, uıaly telefon nómiri jáne (qalaý boıynsha) elektrondyq poshta mekenjaıy talap etiledi.

Dıskonttyq karta boıynsha jeńildikter bılet kassalarynda nemese bilet.railways.kz saıty arqyly bılet satyp alynǵan jaǵdaıda ǵana qoldanylady. Ekinshi deńgeıli bankterdiń platformalary arqyly satyp alynǵan bıletterge jeńildikter qarastyrylmaıdy.

Jeńildikter jyl saıyn belgilengen kezeńde usynylady. Alaıda merekelik jáne kanıkýl ýaqytynda dıskonttyq kartalardyń qoldanylýy toqtatylady:

• 2026 jylǵy 20–29 naýryz aralyǵy;

• 2026 jylǵy 25–30 jeltoqsan aralyǵy;

• maýsym–tamyz aılary.

Aıta ketelik poıyzdarda jolaýshylarǵa arnalǵan qandaı servıster bary týraly jazǵan edik.