Zeınetkerlerge materıaldyq kómek tóleý týraly aqparat – jalǵan

ASTANA. KAZINFORM – Zeınetaqysy 140 myń teńgeden aspaıtyn zeınetkerlerge memleketten 50 myń teńge mólsherinde birjolǵy tólem beriletini týraly messendjerler men áleýmettik jelilerde taraǵan aqparat shyndyqqa janaspaıdy. Bul týraly Qazaqstan Respýblıkasy Eńbek jáne halyqty áleýmettik qorǵaý mınıstrligi habarlady.

Messendjerlerde zeınetkerlerge materıaldyq kómek tólenetini týraly jalǵan aqparat taralýda. Taǵaıyndalǵan qarajatty alý úshin belgisiz adamdar Halyqqa qyzmet kórsetý ortalyǵyna habarlasyp, № 2 nysandy toltyrýdy usynady.

«Atalǵan materıaldyq kómek túri joq ekenin jáne memlekettik qoldaýdyń tıisti sharalary týraly resmı aqparat tek qana 1414 nómirinen SMS-habarlamalar arqyly taratylatyny habarlaımyz. Azamattardan tek resmı kózderdegi aqparatty paıdalanýyn suraımyz. Jalǵan aqparatty taratý zańmen jazalanatynyn esterińizge salamyz»,- dep jazylǵan habarlamda.