Zeınetkerlerge qosymsha 60 myń teńgeden tólenip jatyr – feık

ORAL. QazAqparat – Qazirgi kezde áleýmettik jelilerde jáne messendjer arqyly taratylyp jatqan zeınetkerlerge «22 000 jáne 60 000 teńge somasyna qosymsha áleýmettik tólem alý úshin halyqqa qyzmet kórsetý ortalyǵyna ótinish berý qajet» degen aqparat jalǵan, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy BQO boıynsha fılıalynyń dırektory Nádir Qurymbaevtyń aıtýynsha, oblysta mundaı ózgeris joq.

«Suraq týyndaǵan jaǵdaıda azamattardan 1414 nómiri boıynsha biryńǵaı baılanys ortalyǵyna habarlasýdy suraımyz. Sondaı-aq jalǵan málimetterdi taratpaýdy ótinemiz», dedi N.Qurymbaev.

Kúni búgin jalaqynyń eń tómengi mólsheri – 70 myń, al memlekettik bazalyq zeınetaqy tóleminiń eń tómengi mólsheri – 24 341, zeınetaqynyń eń tómengi mólsheri – 53 076 teńge.

Jyl basynan bastap Batys Qazaqstan oblysynda jasyna baılanysty zeınetaqy jáne eńbek sińirgen jyldary úshin zeınetaqy tólemderiniń mólsheri - 10,5, al járdemaqy, áleýmettik tólemder - 8,5 paıyzǵa ósti.

Eske sala keteıik, budan buryn Oral qalasynda órtke baılanysty tirkeý jáne jer kadastry bóliminiń mekenjaıy ózgergenin jazǵan bolatynbyz.