Zeınetkerlerdiń nesıesi keshirile me — Úkimet jaýaby
ASTANA. KAZINFORM — Naýryz aıynyń basynda Májilis depýtattary Premer-mınıstrdiń orynbasary Ermek Kósherbaevtyń atyna zeınetaqy tólemderin zańnamadan «kiris kózi» retinde alyp tastap, zeınetkerlerdiń qaryzyn keshirý kerektigi týraly saýal joldaǵan bolatyn.

Vıtse-premerdiń jaýabynda zeınetkerler de kez kelgen Qazaqstan azamaty sııaqty jeke tulǵanyń sottan tys bankrottyǵy arqyly qaryz problemasyn retteı alatyny jáne atalǵan tetikti jetildiretin jańa normalar ázirlenip jatqany aıtylǵan.
— Zań boıynsha memlekettik bıýdjetten jáne Memlekettik áleýmettik saqtandyrý qorynan tólenetin járdemaqylar men áleýmettik tólemderdi aýdarýǵa arnalǵan bank shottaryndaǵy aqshany úshinshi tulǵalardyń óndirip alýynan memleket qorǵaıdy. Zeınetaqy atalǵan tólem túrlerine jatqyzylmaǵan. Áleýmettik Kodekstiń 203-babyna sáıkes zeınetaqydan ustap qalý atqarýshylyq is júrgizý tártibimen júrgizilýi múmkin. Biraq zeınetaqydan ustap qalý tólemi 50 paıyzdan aspaý kerek, — dep túsindiredi Ermek Kósherbaev.
Depýtattardyń usynysyn Ulttyq banktegiler de qoldamasa kerek.
— Ulttyq banktiń ustanymy boıynsha, eger zeınetaqy tólemderin úshinshi tulǵalardyń óndirip alýynan tolyq qorǵaý engizilse, onda zeınetkerlerge beriletin nesıelerdiń qaıtarylýyn qamtamasyz etýi qıynǵa soǵýy yqtımal. Osylaısha bankter óz kezeginde atalǵan sanattaǵy azamattarǵa nesıe berýdi qatańdatýy nemese ony toqtatýdy qarastyrýy múmkin. Bul osy bank ónimin paıdalanatyn zeınetkerler arasynda kelispeýshilik týǵyzady. Jekelegen sanattaǵy azamattardyń qaryzyn keshirý barlyq qaryz alýshylardyń, onyń ishinde tóleý qabileti bar azamattardyń arasynda masyldyqtyń ósýine jáne kredıttik tártibine teris áser etip, óz kezeginde qarjy naryǵy úshin júıeli táýekelderdiń paıda bolýyna ákep soǵýy múmkin, — dep jazylǵan jaýapta.
Buǵan deıin Bank aldyndaǵy boryshy 2,1 mlrd teńgege jetken astanalyq turǵyn bankrottyq rásimdeı almaı júrgenin jazǵan edik.