Zeınetkerlerdiń kıberqaýipsizdigi kúsheıtildi: SQO-da WhatsApp chattary quryldy
ASTANA. KAZINFORM — Qazir SQO-da 400-ge jýyq zeınetker kıberqaýipsizdik chatyna qosyldy, dep habarlaıdy QR ІІM baspasóz qyzmeti.
Soltústik Qazaqstan oblysynda polıtseıler ınternet-alaıaqtyqtyń aldyn alý jáne turǵyndardyń kıberqaýipsizdik jónindegi saýattylyǵyn arttyrý maqsatynda WhatsApp messendjerinde úsh arnaıy top qurdy. Olardyń biri zeınetkerlerge, ekinshisi bilim berý, úshinshisi densaýlyq saqtaý salasynyń qyzmetkerlerine arnalǵan.
Top múshelerine kún saıyn ınternet-alaıaqtyqtyń keń taralǵan tásilderi men saqtaný joldary týraly aqparat, sondaı-aq kıberqylmyskerlerdiń arbaýyna túspeýge kómektesetin paıdaly keńester jiberiledi.
— Chattardyń taǵy bir artyqshylyǵy — turǵyndar kez kelgen ýaqytta ózderin alańdatqan máseleler boıynsha suraq qoıyp, mamandardan keńes ala alady. Top quramynda polıtsııa, prokýratýra jáne memlekettik organdardyń qyzmetkerleri bar. Olar azamattarǵa kúmándi jaǵdaılardy baǵalaýǵa jáne alaıaqtyq áreketterdiń aldyn alýǵa kómektesedi, — deıdi tártip saqshylary.
Polıtsııa qyzmetkerleri profılaktıkalyq kezdesýler barysynda turǵyndarǵa arnaıy toptarǵa qosylýǵa múmkindik beretin QR-kodtardy taratady. Osyndaı jumys Petropavl qalasyndaǵy Sátbaev kóshesinde ótken biryńǵaı profılaktıka kúni aıasyndaǵy is-shara kezinde de uıymdastyryldy.
Іs-sharaǵa polıtsııanyń barlyq bólimsheleri jumyldyrylyp, profılaktıkalyq esepte turǵan azamattardyń turǵylyqty jerleri tekserildi. Sonymen qatar turǵyndarmen qoǵamdyq qaýipsizdik máseleleri boıynsha túsindirý jumystary júrgizilip, ınternet keńistigindegi qaýip-qaterlerge erekshe nazar aýdaryldy.
Tártip saqshylary egde jastaǵy qala turǵyndaryna zeınetkerlerge arnalǵan chatqa qosylýdy usyndy. Polıtsııanyń pikirinshe, profılaktıkalyq jumystyń bul formaty qarttardyń alaıaqtyq shemalary týraly habardarlyǵyn arttyryp, kúmándi qońyraýlar men habarlamalarǵa der kezinde mán berýge múmkindik beredi.
— Bul baǵyttaǵy jumystyń ózektiligi de joǵary. Qashyqtan jasalatyn alaıaqtyq qylmystarynyń qurbandarynyń árbir tórtinshisi — zeınetker. Jyl basynan beri ınternet-alaıaqtyqtan 363 adam zardap shekse, olardyń 88-i — zeınet jasyndaǵy azamattar. Qazir arnaıy chattarǵa shamamen 400 zeınetker, 500 medıtsına qyzmetkeri jáne 300 pedagog qosylǵan, — deıdi polıtsııa qyzmetkerleri.
Polıtsııa azamattardy beıtanys adamdardyń qońyraýlary men habarlamalaryna saqtyqpen qaraýǵa, bank kartasynyń derekteri men SMS-kodtardy eshkimge bermeýge jáne kúmándi siltemelerge ótpeýge shaqyrady.
Buǵan deıin Túrkistanda alaıaqtar QMA qyzmetkerleri retinde tanysyp, 15 mln teńge bopsalaǵanyn jazǵanbyz.
