Zeınetkerler úshin eń nashar 5 memleket ataldy
ASTANA. QazAqparat - Natixis frantsýzdyq qarjy korporatsııasy qaı elde zeınetke shyǵý tıimdi ekendigin anyqtady, dep habarlaıdy QazAqparat Lenta.ru saıtyna silteme jasap.
Zertteý nátıjelerine sáıkes , zeınetkerler úshin eń nashar memleketterdiń alǵashqy bestigine Túrkııa, Reseı, Brazılııa, Gretsııa jáne Úndistan engen.
Bul rette, Norvegııa, Shveıtsarııa, Islandııa, Shvetsııa jáne Jańa Zelandııa kóshbasshy elder bolyp otyr. Germanııa - jetinshi, AQSh - 17-shi, Frantsııa 19-ynshy orynǵa ornalasqan.
Esepteý barysynda tórt negizgi faktor nazarǵa alyndy: densaýlyq saqtaý deńgeıi, zeınetaqy kólemi, ómir súrý sapasy jáne materıaldyq aýqattylyq. Olardyń árqaısysy 0-den 100-ge deıin baǵalandy.
Natixis - Frantsııanyń iri bankteriniń biri. Jahandyq zeınet ındeksin 2013 jyldan beri eseptep keledi. Zertteý barysynda Dúnıejúzilik banktiń, sondaı-aq ulttyq statıstıkalyq vedomstvolardyń málimetterine súıenedi.
Aıta keteıik, Qazaqstandaǵy zeınetkerlerdiń ál-aýqaty zertteýde kórsetilmegen.
