Zeınetkerler múlik salyǵynan bosatylǵan ba

ASTANA. QazAqparat - Áleýmettik jeliler men messendjerlerde zeınetkerler múlik salyǵynan tolyǵymen bosatylatyny týraly aqparat tarady. Memkirister komıteti bul aqparat shyndyqqa janaspaıtynyn málimdedi, dep habarlaıdy QazAqparat.

Salyq kodeksine sáıkes bólek turatyn zeınetkerler zańdy mekenjaıy boıynsha tek qana zeınetkerler tirkelgen barlyq salyq salý obektisiniń jalpy qunynan aılyq eseptik kórsetkishtiń 1000 eselengen mólsheri sheginde bosatylady.

Esepteý barysynda respýblıkalyq bıýdjet týraly zańda belgilengen jáne tıisti qarjy jylynyń 1 qańtaryna qoldanysta bolatyn aılyq eseptik kórsetkish mólsheri qoldanylady.

Sonymen qatar, kelesi tulǵalar da jeke tulǵalardyń múlik salyǵynan:

1) aılyq eseptik kórsetkishtiń 1000 eselengen mólsheri sheginde – Keńes Odaǵynyń batyrlary, Sotsıalıstik Eńbek eri, «Halyq qaharmany», «Qazaqstannyń Eńbek Eri» ataqtaryna ıe bolǵan, úsh dárejeli Dańq ordenimen jáne «Otan» ordenimen nagradtalǵan adamdar, «Batyr ana» ataǵymen jáne «Altyn alqa» alqasymen nagradtalǵan kópbalaly analar;

2) aılyq eseptik kórsetkishtiń 1500 eselengen mólsheri sheginde – Uly Otan soǵysynyń ardagerleri, jeńildikter boıynsha Uly Otan soǵysynyń ardagerlerine teńestirilgen ardagerler jáne basqa memleketterdiń aýmaǵyndaǵy urys qımyldarynyń ardagerleri, Uly Otan soǵysy jyldarynda tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen nagradtalǵan adamdar, sondaı-aq 1941 jylǵy 22 maýsym – 1945 jylǵy 9 mamyr aralyǵynda keminde alty aı jumys istegen (qyzmet ótkergen) jáne Uly Otan soǵysy jyldarynda tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen nagradtalmaǵan adamdar, múgedektigi bar adamdar, sondaı-aq Salyq kodeksiniń 526-babynyń 2-tarmaǵynda belgilengen ózge de tulǵalar bosatylady.

2022 jyl úshin múlik salyǵyn tóleý merzimi 1 qazanda aıaqtalady.