Zeınetkerler kommýnaldyq «bereshekterin» alaıaqqa tólep kelgen
PAVLODAR. QazAqparat - Pavlodarlyq tártip saqshylary zeınetkerlerdiń ondaǵan myń teńge aqshalaryn qoldy etip kelgen Aqsý qalasynyń 42 jastaǵy turǵynyn tutqyndady, dep habarlaıdy «QazAqparat» HAA tilshisi.
Pavlodar oblystyq ishki ister departamentiniń deregi boıynsha, kúdikti Aqsýdan Pavlodarǵa kelip, turǵyn úılerdiń kireberisterinde egde jastaǵy adamdardyń úıge kirgenin kútip turǵan. Onymen birge ilesip kirgennen keıin, joǵary kóterilip bara jatqan kúı tanytyp, zeınetkerdiń páterge kirgenin ańdyǵan. Keıin esikti qaǵyp, ózin baqylaýshy retinde tanystyrady. Páterge kirgen ol esepteýishterdiń kórsetkishin qarap, ony dápterge jazǵan bolady. Qarttyń jalǵyz turatynyna kóz jetkizgennen keıin, páter ıesiniń elektr energııasyna, sýǵa qaryz bolyp qalǵandyǵyn jáne eki aıǵa jaryqty óshiretindigin aıtyp, qorqytady. Er kisi «qaryz» somasynyń kólemi az emes ekendigine (80 000, 60 000, 50 000 teńge) sendirgen. Záre-quty qalmaǵan zeınetkerler sol sátte-aq jınaǵan aqshalaryn qaskúnemniń qolyna ustatyp otyrǵan. Al ol «bereshektiń» ótelgeni týraly túbirtek jasaǵan.
ІІD aqparatyna súıensek, er kisi osyndaı úlgidegi 17-den astam qylmys jasaǵan, buryn ol osyndaı qylmysy úshin sottalǵan da. Ustalǵan azamat bar kinásin moıyndady, qazirgi tańda qamaýda otyr. Atalǵan fakti boıynsha QR Qylmystyq kodeksiniń «alaıaqtyq jasaý» baby boıynsha sotqa deıingi tergeý jumystary júrgizilýde.
