Alaıaqqa aldanǵan zeınetkerdiń 2 mln teńgesi polıtsııa kómegimen qaıtaryldy
PAVLODAR. KAZINFORM — Pavlodarda zeınetker áıel 2 mln teńgeden astam qarajattan aıyryla jazdady. Bul týraly Polisia.kz jazdy.
Pavlodar oblysynda zeınetkerge alaıaqtar habarlasyp, odan qarajat talap etken.
— Úı telefonyma belgisiz er adam qońyraý shaldy, ózin Ulttyq bank qyzmetkerimin dep tanystyryp, qujattardy shuǵyl túrde qaıta rásimdeý qajettigin aıtty. Suhbat barysynda ol meniń banktegi esepshotymda qandaı soma bar ekenin surady. Men esepshotta 2 mln teńgeden astam qarajat bar ekenin aıttym. Keıin onyń nusqaýymen 1 mln 300 myń teńgeni aýdaryp berdim. Keıin er adam qaıta qońyraý shalyp, úıge kólik kelip, meni kórsetilgen mekenjaıǵa jetkizetinin aıtty. Sol ýaqytta júrgizýshimen sóılespeýim týraly qatań nusqaý berdi. Barlyq ýaqyt boıy ol WhatsApp messendjeri arqyly baılanysta bolyp, naqty nusqaýlar berip otyrdy, — deıdi polıtsııaǵa júgingen zeınetker.
Barlyq áreketter telefon arqyly alaıaqtyń nusqaýymen jasalǵan. Zeınetkerge eshkimmen sóılesýge jáne týystarymen bul taqyrypty talqylaýǵa múmkindik berilmegen. Alaıaqtar ony táýlik boıy quryǵynda ustap otyrǵan. Áıel qalǵan somany aýdarý úshin bankke barǵan kezde, banktegi qyzmetker onyń minez-qulqyna mán berip, polıtsııaǵa habarlaǵan.
Polıtsııa qyzmetkerleri kelgende qosymsha zańsyz áreketterdiń aldyn alyp, qalǵan qarajattyń aýdarylýyna jol bermedi. Sondaı-aq zeınetkerge buryn aýdarǵan qarajatty qaıtarýǵa kómektesti. Zeınetker men onyń jubaıy polıtsııa qyzmetkerlerine jedel ári kásibı jumysy úshin úlken alǵys bildirip, sol arqyly qarjylyq jınaqtarynyń mańyzdy bóligin saqtap, urlanǵan qarajatty qaıtarýǵa múmkindik alǵandaryn aıtty.
Buǵan deıin Oralda kıberalaıaqtar turǵynnyń 5 mıllıon teńgesin jymqyrǵanyn jazǵan edik.