Zeınetkerdiń tirnektep jıǵan aqshasyn bir kúnde jymqyryp ketti
ASTANA. 27 maýsym. QazAqparat - Jambyldyq polıtseıler is-sharalar keshenin ótkizý barysynda, 21 jastaǵy tergeý-qamaýyndaǵy kúdiktiniń maýsym aıynyń basynda, Taraz qalasyndaǵy zeınetkerlerdiń páterine qaraqshylyq shabýyl jasaǵan qylmysyn dáleldedi.
Bul týraly búgin ótken brıfıngte ІІM Baspasóz qyzmetiniń basshysy Nurdildá Oraz málimdedi.
Kúdikti eki sybaılasymen medıtsınalyq betperde kıip, ózderin elektr jóndeýshilermiz dep tanystyrǵan. Qaraqshylardyń sózine senip, 70 jastaǵy zeınetker áıel esikti ashqan kezde, olar úıge basa-kóktep kirgen. Áıeli men kúıeýi ekeýin pyshaqpen qorqytyp, olardan 700 myń teńgeni, altyn saqınalary men uıaly telefondaryn tartyp alyp ketken.
Zeınetkerler óz zeınetaqylaryn páter jóndeýge jınap júrgen kórinedi. Qazirgi ýaqytta kúdiktiniń sybaılastaryn izdestirý is-sharalary júrgizilýde.
