Zeınetker týysyn qutqarý úshin jalǵan tergeýshige jarty mln teńge berip jibergen
ShYMKENT. KAZINFORM - Shymkentte zeınetker alaıaqqa aldanyp, jarty mln teńgesinen aıyrylyp qaldy, dep habarlaıdy Polisia.kz.
Alaıaqtardyń arbaýyna túsken - Shymkenttiń 90 jastaǵy turǵyny. Qart kisige belgisiz tulǵa qońyraý shalyp, ózin polıtsııa qyzmetkeri retinde tanystyryp, kelini jol-kólik oqıǵasyn jasaǵanyn habarlaǵan.
Alaıda máseleni belgili somamen sheshýge bolatynyn jáne zeınetkerden ol aqshany kýrer alyp ketetindigin aıtqan.
Týysyna kómektesý úshin qart ana alaıaqtarǵa barlyq jınap-tergen qarajatyn, ıaǵnı jarty mln teńgesin berip jibergen.
Іzdestirý is-sharalarynyń barysynda tártip saqshylary beınebaqylaý kameralarynyń kómegimen jábirlenýshiniń úıinen qolma-qol aqshany alý úshin kelgen tulǵany anyqtap, ustady. Ol 33 jastaǵy qala turǵyny bolyp shyqty.
Óz jaýabynda ustalǵan er adam messendjer arqyly alǵan nusqaýǵa sáıkes áreket etkenin jetkizdi. Alǵan aqshany belgili bir shotqa aýdarýǵa kelisken ol shartty oryndamaı, alaıaq “jumys berýshisin” aldap ketken eken.
Qazirgi tańda qylmysqa qatysy bar basqa da tulǵalardy anyqtaýǵa baǵyttalǵan tergeý jumystary júrgizilip jatyr. Quqyq qorǵaýshylar azamattarǵa alaıaqtyqtyń osy túri týraly eske salady.
– Alaıaqtar ózderin polıtseıler retinde tanystyryp, týysyńyzdyń qıyndyqqa tap bolǵanyn habarlap, al máseleni belgili bir aqsha qarajaty sheshetinin aıtýy múmkin. Mundaı jaǵdaıda birden polıtsııanyń “102” nómirine qońyraý shalyp, aqparatty tekserińiz, úreılenbeńiz, ásirese beıtanys adamdarǵa aqsha aýdarmańyz, – deıdi polıtsııa qyzmetkerleri.
