Zeınetker Parıj-Astana araqashyqtyǵyn velosıpedpen baǵyndyrdy
ASTANA. 7 qyrkúıek. QazAqparat - Kún buryn elordaǵa Parıj-Astana araqashyqtyǵyn velosıpedpen baǵyndyrǵan 65 jastaǵy Jan Lıýk Bonrand keldi, dep habarlaıdy 24.kz saıtynan.
Shabandoz álem boıynsha saıahatyn 20 jyl buryn bastaǵan. Zeınetker kóp ýaqyt boıy Azııa memleketterine baryp-kelýdi armandaǵan. Ol kóp jyl boıy zańger qyzmetin atqarǵan. Parıjde jubaıy men 2 balasy qaldy. Al 20 jyl buryn álemdi sharlaýǵa bet alǵan Bonrandtyń basty maqsaty - túrli elderdiń mádenıetimen tanysý. Ol ýaqyt ishinde Ulybrıtanııa, Grýzııa, Reseı jáne taǵy da basqa 10 shaqty memleketke baryp úlgergen. Bul - shabandozdyń Ortalyq Azııaǵa birinshi kelýi.
"Men kásibı sportshy emespin, múmkindigimshe osyndaı saıahattardy jasap turamyn. Eger aýa raıy jaǵymdy bolsa, saǵatyna 25 shaqyrym júremin. Jyl saıyn 1 myń shaqyrym júrip ótýge tyrysamyn. Ár saıahattan keıin Parıjge qaıtamyn. Al Astana jaıly aıtatyn bolsam, qalalaryńyz óte tamasha, naǵyz XXI ǵasyr qalasy", - deıdi saıahatshy Jan Lıýk Bonrand.
Jan Lıýk Bonrand Astanaǵa Sergeı dosynyń shaqyrýymen keldi, olar jyl buryn ǵalamtor arqyly tanysqan. Keıin Frantsııa azamaty Qazaqstanǵa kelýge úlken qyzyǵýshylyq tanytypty.
Zeınet jasyndaǵy shabandozdyń jaı qaıtar túri joq. Ol endi Tokıoǵa sapar shegýdi armandap otyr.
