Zeınetker ofıtserlerge zeınetaqy mólsheri saralanǵan túrde arttyrylýy tıis - S. Toqpaqbaev
ASTANA. Qarashanyń 11-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Sát Toqpaqbaev zeınetker ofıtserlerdiń zeınetaqy mólsherin qaıta qaraýǵa qatysty másele kóterdi,
dep habarlaıdy QazAqparat.
«Meniń atyma Qarýly kúshterdiń ardager ofıtserleri, sonyń ishinde «Qarýly kúshterdiń ardager ofıtserleri» qoǵamdyq birlestiginiń músheleri hat joldap, ózderiniń narazylyqtaryn bildirdi. Olar kúsh qurylymdary zeınetkerlerin zeınetaqymen qamtamasyz etýde qoldan jasalǵan kemshilikterdiń oryn alyp otyrǵanyna nazar aýdarýdy suraıdy. Mysaly, áskerı qyzmet ótkergen ýaqytynda áskerı bólim (polk, brıgada, dıvızııa jáne t.b) komandıri laýazymynda bolǵan, Qazaqstan Respýblıkasy Qorǵanys mınıstrliginiń polkovnık ataǵyndaǵy zeınetkerlerdiń zeınetaqysy múldem tómen. Olar qazirgi ýaqytta 2006 jylǵy maýsymnyń 1-de zeınet demalysyna shyqqan osyndaı ofıtsermen salystyrǵanda 50 paıyzǵa jáne odan da tómen zeınetaqymen qamtamasyz etilip otyr. Memleket basshysynyń 2006 jylǵy mamyrdyń 25-degi tapsyrmasyn oryndaý úshin Qazaqstan Respýblıkasy Úkimetiniń № 454 Qaýlysy qabyldanyp, munda osy kemshilikter tek bir rettik qana joıylǵan», dedi depýtat.
Osyǵan oraı, S. Toqpaqbaev zeınetker áskerı qyzmetshiler arasynda áleýmettik shıelenisti bolǵyzbaý úshin kúsh qurylymdary zeınetkerlerine zeınetaqy mólsherlerin saralanǵan túrde arttyrý qajettigin alǵa tartady. «Áskerı qyzmetshilerdiń aqshalaı tutyný deńgeıiniń ózgerýine sáıkes zeınetaqylardy arttyrýdy kózdeıtin «Qazaqstan Respýblıkasyndaǵy zeınetaqymen qamtamasyz etý týraly» zańyna tolyqtyrýlar engizý múmkindigin qaraýdy suraımyn», dedi depýtat.
