Zeınetker qarýly qaraqshynyń bankti tonaýyna jol bermedi
ASTANA. 20 qazan. QazAqparat - Avstrııanyń Sankt-Egıden-am-Shtaınfeld qalasyndaǵy bank qyzmetkerleri 82 jastaǵy zeınetkerge dán rıza.
Ol qarýly qaraqshynyń bankti tonaýyna jol bermedi, dep jazady Alash aınasy.
The Daily Telegraph-tiń habarlaýynsha, ǵımaratqa betperde kıgen, tapanshamen jáne jarylǵysh zatpen qarýlanǵan er adam kirip, kassırden aqsha talap etken. Sol kezde qarııa Gerta Vallıker qaraqshyǵa tap berip, ony soqqynyń astyna alady. «Eger aqsha kerek bolsa, jumys iste, jalqaý saıtan!» dep aıqaılaǵan zeınetker jigittiń betperdesin julyp alyp, onyń qolyndaǵy qarajatyn jerge shashyp tastaıdy. Beınebaqylaý qondyrǵysyna túsip qalýdan qoryqqan qaraqshy bárin tastap, oqıǵa ornynan qashyp ketedi. Polıtseıler qarııanyń batyldyǵyna rıza bolyp otyr. Al jýrnalısterge suhbat bergen Vallıker mundaı táýekelge ádiletsizdikke tózbeıtindikten barǵanyn aıtty. «Men aıyna 800 evro zeınetaqy alamyn. Bul - meniń ómirboıǵy mańdaı terimniń tabysy. Halyqtyń adal aqshasyn áldekimniń teginnen tegin tartyp alǵysy kelgeni meniń ashýymdy týǵyzdy», - deıdi ol.
