Zeınetker Ertis arqyly Kýrchatovtan Pavlodarǵa deıin júzip ótpek
PAVLODAR. QazAqparat - Ertis ózeni arqyly júzip ótetin komanda Pavlodardan Shyǵys Qazaqstan oblysynyń Kýrchatov qalasyna jolǵa shyqty. Atalmysh ekspedıtsııa Ertis Dýmany merekesi aıasynda júzege asýda, dep habarlaıdy pavlodarnews.kz.
«7 kúnge sozylatyn bul shara 22 shilde kúni bastaldy», - deıdi Pavlodar Geografııa úıiniń dırektory Aleksandr Vervekın. - Ekıpajdyń bir bóligi Maı aýdanynyń Kóktóbe aýylynda aýysady. Qatysýshylar ózendi tórt eskekti jeńil qaıyqpen jáne «PavGeo» qoǵamdyq birlestiginiń «Kolıbrı» qaıyǵymen júzip ótedi».
Ekıpajdyń quramyna Astana, Pavlodar, Ekibastuz, Novosibir qalalary men Maı, Ýspen aýdandary jáne Aqsý aýyldyq aımaǵynan barlyǵy 21 adam endi.
Júzý qashyqtyǵy 281 shaqyrymdy quraıdy. Ekibastuz qalasynyń 66 jastaǵy turǵyny, tanymal velotýrıst Anatolıı Pyrlık - eń jasy úlken qatysýshy. Degenmen ol óte tájirıbeli sportshy. Eki jyl ishinde bes veloekspedıtsııaǵa shyqqan. Máselen, Anatolıı Fılıppovıch muz ústinde Baıqalǵa deıin, Q. Sátbaev kanaly arqyly Qaraǵandydan Aqsýǵa deıin júrip ótedi. Ekıpajdy 28 shilde kúni Pavlodar qalasynyń tómengi jaǵalaýynda qarsy alyp, sol kúni Ertis Dýmany merekelenedi.
Aıta keteıik, bul ekspedıtsııany pavlodarlyq «Jasyl el» oblystyq shtaby men Geografııa úıi jastar saıasaty máselesi jónindegi basqarmanyń qoldaýymen ótkizýde.
