Zeınetker áıeldi uryp, telefonyn tartyp áketken qaraqshy ustaldy
ORAL. QazAqparat - Oralda tártip saqshylary zeınetker áıeldi tonap ketken qaraqshyny ustady, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 4 aqpan kúni shamamen saǵat 17.00-de Gagarın kóshesi 99-úıdiń mańynda oryn aldy.
Kisi tonaý oqıǵasy beınebaqylaý kamerasyna túsip qalǵan. Beınejazbadan er adam úıdiń janyndaǵy oryndyqta otyrǵan áıeldiń qasyna kelip, áńgimelesip otyrǵany, sodan keıin oǵan birneshe ret soqqy jasap, telefonyn tartyp áketkeni anyq kórinedi.
Departamenttiń baspasóz hatshysy Álııa Naýryzǵalıevanyń aıtýynsha, er adam kúsh kórsetip, 1945 jylǵy áıelge tıesili «Homtom HT16» uıaly telefonyn tartyp alǵan da, taıyp turǵan.
Polıtsııa qyzmetkerleri beınebaqylaý kamerasynyń kómegimen osy qylmysqa kúdikti retinde 1981 jylǵy er adamdy anyqtap, qolǵa túsirdi.
«Keıin ol ýaqytsha oqshaýlaý ızolıatoryna qamaldy. Qazirgi kezde QR QK 191-baby 2-bóligine sáıkes (kisi tonaý) tergeý amaldary júrgizilýde», dedi QazAqparat tilshisine Á.Naýryzǵalıeva.
Aıta keteıik, atalǵan bap boıynsha qylmysy dáleldengen jaǵdaıda kúdikti múlki tárkilenip, úsh jyldan jeti jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
