Zeınetker 700 myń teńge qaryzyn qaıtarmaǵan boıjetkenniń kóligin aıdap ketken
SEMEI. QazAqparat – Semeı qalasynda polıtsııa qyzmetkerleri boıjetkenniń kóligin aıdap ketken zeınetkerdi ustady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Zaton polıtsııa bólimine kelgen18 jastaǵy boıjetken aryz túsirgen. Óz sózinde ol tús kezinde beıtanys er adamnyń «700 myń teńge qaryzyńdy qaıtarmaǵanyń úshin» dep kóligin aıdap ketkenin jetkizdi.
«Jedel-izdestirý sharalaryn júrgizgen krımınaldyq polıtsııa qyzmetkerleri 65 jastaǵy er adamdy qolǵa túsirdi. Kúdikti birden polıtsııa bólimine jetkizildi», - dep habarlady vedomstvo ókilderi.
Qazirgi ýaqytta atalǵan fakti boıynsha Qazaqstan Respýblıkasy Qylmystyq Kodeksiniń 389-baby 1-bóligine sáıkes sotqa deıingi tergeý amaldary júrgizilýde.
