Zeınetke shyqqan adam bos otyrsa, aýyryp qalady – sheber
Aqtóbelik toqymashylar qazir bir-birimen etene tanysyp, áleýmettik jelide ortaq top ashyp alǵan. Toqymashylardyń kóbi zeınetke shyǵyp, bos ýaqytyn tıimdi ótkizip otyr. Ári tabysy turaqty, tapsyrysty ár aımaqtan qabyldaıdy.
«Qandaı tapsyrys túsedi, bárin toqımyn. Symmen jáne ilmekpen toqı bilemin. Bas kıimnen bastap, aıaq kıimge deıin toqýǵa bolady. Qazir mende kımeshek, kóılekke arnalǵan jaǵa, bas kıimniń birneshe túni, sháli, balalarǵa arnalǵan jeıde bar. Jas kelinge arnap aıaq kıim men oramaldy sándi etip toqyp bere alamyn. Negizi bala kúnimnen bastap toqýdy úırendim. Biraq ómir boıy aspaz bolyp jumys istep, osy iske den qoıýǵa múmkindik bolmady. Al qazir bar yntamdy salamyn. Toqymaı, bos otyrsam aýyryp qalatyn kúıge tústim. Tipti kózildirik te kımeı kettim. Qazir jasym 70-te»,- dedi sheber Tólebıke Qultaeva.
Kishkentaıynan qoı qyrqyp, jún jýyp, ony tútip, ıgirgen úlkenderge qolqabys etip, ózi de úırenip alǵanyn aıtty sheber. Alaıda qazir ıirilgen túrli tústi, túrli sapadaǵy jipti bazardan ońaı taýyp alýǵa bolady. Sırek kezdesetinderin tapsyryspen aldyrady.
«Taıaýda Astanada «Taqııa fest» uıymdastyrylyp, soǵan on toqymashy baryp keldik. Ózim toqymashylardyń respýblıkalyq tobyna qosylyp aldym. Baılanys jaqsy bolǵan soń túrli sharaǵa qatysamyz. Tek qolóner sheberleriniń kórmesi qalada kóp bolmaıdy. Bizge satýǵa arnalǵan bir burysh berse eken deımin. Sonda sheberligimizdi shyńdap, ózgelerge de úıretip, tobymyzdaǵy adam sany kóbeıer edi»,- dedi Tólebıke Qultaeva.
Sheber ár kúnin josparlamaıdy. Biraq qaıda barsa da, qaıda júrse de qolynan jip pen symy, ilmegi túsken emes. Eger úıde otyrsa, kúnine úsh aıaq kıim, keıde eki bas kıim toqı alady. Úlken shálini eki kún toqýǵa bolady. «Іlmekpen toqýdy men 2017 jyly bastadym. Bárin ınternet arqyly úırendim. Bir aýyz oryssha bilmesem de kórip, mashyqtanyp aldym. 6-7 jyl buryn bastaǵan isimde olja kóp. Alǵashynda dúnıelerim áleýmettik jelige salynbady. Qazir bárin júktep, kórsetip otyramyn. Syılyqqa da beremin, satýǵa da shyǵaramyn. Jip qymbat. Bizge Túrkııadan ákelinedi. Jiptiń sapasyna basymdyq beriledi, toqý da óner. Ár sheberdiń qoly ártúrli, qolynan shyqqan dúnıesi ózgeshe. Men óz buıymymda birden tanımyn. Qolymnan shyqqan dúnıeni arzanǵa satpaımyn. Sebebi eńbegimdi baǵalaımyn. Kóz maıymdy taýysyp, uzaq kún otyrǵanda qaıtarymy bolýy tıis. Máselen kımeshekti 35 myń teńgege baǵalaımyn. Jibiniń ózi Túrkııadan jetkizilgen. Keıde ony taba almaı qalamyz. Jaqynda AQSh-qa úsh sháli jiberdim. Jibin Tarazdan aldyrdym. Almaty, Astanadan ta jip alamyz», - dedi ol.
Toqý – psıhologııalyq jattyǵý. Adamnyń oıǵa shomylýyna jol bermeıdi. Tipti qarap otyryp, tıiserge qara tappaıtyn adamǵa da em. Óıtkeni bar zeıinin salyp, toqýdy bastaǵan adam ony aıaqtaǵansha baıyz tappaıdy. Sóıtip ýaqytyn da tıimdi ótkizedi.
«Men zeınetke shyqqan soń da tórt jyl jumysty jalǵastyrdym. Al jumysty aıaqtaǵan soń tańerteń turam, keshke jatamyn. Óte qıyn kez. Sodan ınternet kirgizdi. Áleýmettik jelini qaradym. Úırendim. Balalarǵa sym men jip ákelip ber dedim. Ol kezde kózildirik kıdim. Jazda toqıtynymdy alyp, kózildirikti otyrǵan jerimde umytyp ketippin. Sodan ózgelerge qarap, men de kózildirik kımeı kettim. Qazir kısem aýyrtady. Bul da toqyma toqyǵannyń qudyreti dep esepteımin»,- dedi sheber.
