Zeınetke deıingi úsh jyl: «Bolashaq» boıynsha taǵylymdama shekteýi kimderge arnalǵan

ASTANA. KAZINFORM — Ǵylym jáne joǵary bilim mınıstri Saıasat Nurbek Májilistegi baspasóz máslıhatynda «Bolashaq» baǵdarlamasynyń jas shekteýleri týraly túsinikteme berdi.

— Búgingi tańda ǵylymı taǵylymdama aıasynda eki egde jastaǵy ǵalym «Bolashaq» baǵdarlamasynyń stıpendııasyn alyp otyr. Onyń biri 70-ke taıaǵan, ekinshisiniń jasy 68-de. Buryn shyn máninde jas shekteýi bolǵan. 40-tan joǵary bolmaý kerek edi. Keıin ony alyp tastaǵanbyz. Onda da kásibı taǵylymdamadan ótýshilerge múmkindik berý úshin solaı istedik. Búgingi tańda mynandaı shekteýler belgilengen — zeınet jasyna 3 jyl qalǵandarǵa shekteý qoıylady. Bul shekteý bıyldan bastap kúshine endi, — dedi ol.

Sondaı-aq, ol «Bolashaqtyń» doktorantýrasyna túskenderdiń ishinde zeınet jasyndaǵy adamdardyń joq ekenin atap ótti. 

— Bul jerde áńgime jalpy taǵylymdamalar týraly bolyp otyr. «Bolashaq» baǵdarlamasynyń doktorantýrasynda 60-tan asqan adamdardyń oqyǵan jaǵdaıy tirkelgen joq, — dedi Saıasat Nurbek.

Buǵan deıin «Bolashaq» baǵdarlamasyndaǵy til kýrstaryna kim qatysa alatynyn jazǵan edik.