Zeınetaqynyń jańa tujyrymdamasynda memlekettiń, qyzmetker men jumys berýshiniń jaýapkershiligi kúsheıtiledi
ASTANA. QazAqparat - Búgin Ortalyq kommýnıkatsııalar qyzmetinde Qazaqstandaǵy jańa zeınetaqy júıesi tanystyryldy.
QR Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, jańa tujyrymdama zeınetaqy tólemderi mólsheriniń barabarlyǵyna jáne Qazaqstan Respýblıkasyndaǵy zeınetaqy júıesiniń uzaq merzimdi qarjylyq turaqtylyǵyna kepildik berý maqsatynda memlekettiń, qyzmetker men jumys berýshiniń jaýapkershiligin kúsheıte otyryp, zeınetaqymen qamsyzdandyrýdyń qoldanystaǵy kópdeńgeıli júıesin saqtap qalýdy kózdeıdi.
«Basty tujyrymdamalyq ózgeris qoldanystaǵy jınaqtaýshy júıesin jumys berýshilerdiń qyzmetkerlerdiń paıdasyna mindetti 5 paıyz jarnalary esebinen qalyptasqan jańa shartty-jınaqtaýshy komponentimen tolyqtyrý bolyp tabylady», - deıdi T. Dúısenova.
Onyń aıtýynsha, jańa júıe jınaqtaý sekildi úlestirý prıntsıpin de qoldaıdy.
«Atap aıtqanda, júıege qatysýshy árbir adamǵa derbes zeınetaqy shoty (qazirgi jınaqtaý shotyna qosymsha) ashylatyn bolady, onda jumys berýshilerdiń jarnalary tirkelip otyrady. Jumys berýshilerden túsetin jarnalar kapıtaldandyrylmaıdy jáne jekelegen adamdardyń menshigi bolmaıdy, ol osy júıege qatysýshylardyń aǵymdaǵy zeınetaqylaryn tóleýge jumsalatyn bolady. Zeınetaqy mólsheri jumys berýshiniń 5 paıyzdyq jarnalarynyń esebinen qalyptasatyn jınaq negizinde aıqyndalady. Zeınetaqy ómir boıy tólenetin bolady», - dep atap ótti mınıstr.
T. Dúısenovanyń aıtýynsha, zeınetaqy tóleminiń bul túri azamattardyń júıege qatysý ótili 5 jyldan kem bolmaǵan jaǵdaıda taǵaıyndalatyn bolady.
