Zeınetaqynyń bolashaqta ósýi ekonomıkalyq ahýalǵa baılanysty bolady - G.Ábdiqalyqova
ASTANA. 8 maýsym. QazAqparat - Zeınetaqynyń bolashaqta ósýi ekonomıkalyq ahýalǵa baılanysty bolady. Búgin QR Eńbek jáne halyqty áleýmettik qorǵaý mınıstrligi men «Bas redaktorlar klýby» qoǵamdyq birlestigi arasynda yntymaqtastyq memorandýmyna
qol qoıý barysynda mınıstr Gúlshara Ábdiqalyqova osylaı dedi.
«Sońǵy jyldary biz zeınetaqyny óte jaqsy kóterdik, eki márte 25 paıyz, odan keıin 30 paıyzǵa arttyrdyq. Aǵymdaǵy jyly zeınetaqyny ındeksteý júrgizilýde. Barlyǵy da ekonomıkalyq ahýalǵa táýeldi bolady», - dedi ol.
Bul rette mınıstr zeınataqyny shamadan tys ári jıi kóterý kommýnalyq qyzmetterdiń, azyq-túliktiń baǵasynyń sharyqtaýyna túrtki bolatyndyǵyn esten shyǵarý qajettigin basa aıtty.
«Bul máselede biz barynsha abaı bolamyz. Oryn alyp otyrǵan problemalardy tyńǵylyqty saraptaı otyryp, usynystar ázirleımiz. Árıne ósim ınflıatsııadan tómen bolmaıdy, ıaǵnı ınflıatsııa ósimine qaraı árqashanda da ósirý bolady», - dedi G.Ábdiqalyqova.
