Zeınetaqyny jańǵyrtý jumysyn 2014 jyldan keshiktirmegen abzal - Q. Kelimbetov
ASTANA. 16 mamyr. QazAqparat - Qazaqstanda qalyptasqan jaǵdaıǵa baılanysty zeınetaqyny jańǵyrtý jumystaryn 2014 jyldan keshiktirmegen abzal.
Bul týraly búgin Parlament Senatynyń jalpy otyrysynda «Qazaqstan Respýblıkasynda zeınetaqymen qamsyzdandyrý týraly» zań jobasyn talqylaý barysynda Úkimet basshysynyń orynbasary Qaırat Kelimbetov málim etti.
«Zeınetaqyny jańǵyrtýǵa baǵyttalǵan zań jobasymen jumys toby sońǵy 12 aı boıy aınalysyp keledi, onda aktýarı esepteýleri júzege asty, basqa da kóptegen qajetti keńester alyndy. Meniń oıymsha, 2014 jyldyń 1 qańtarynan bastaýdy josparlaǵan biz úshin ótpeli kezeń asa qajetti. Ekinshiden, buǵan qoǵamnyń belgili bir reaktsııasy bolýy zańdylyq. Óıtkeni, zańdaǵy jańalyqtyń ózi bir jaǵynan qazaqstandyqtardyń basym bóligine qatysty bolsa, ekinshi jaǵynan búkil álem dál osyndaı úderisterdi basynan ótkerip jatyr», - dedi Úkimet basshysynyń orynbasary. Onyń aıtýynsha, TMD arasynda bıýdjet máselesi Qazaqstanǵa qaraǵanda aıtarlyqtaı kúrdeli bolǵanyna qaramastan Ýkraına da osyndaı qadamǵa bel býyp otyr.
«Bizdiń oıymyzsha, Qazaqstandaǵy zeınetaqy júıesine qalyptasqan jaǵdaıdy eskere otyryp, júıeni jańǵyrtýdyń mundaı túzetýlerin eń jaqyn ýaqytta, dálirek aıtqanda 2014 jyldyń 1 qańtarynan bastap engizgenimiz abzal», - dedi vıtse-premer.
