Zeınetaqyny zańsyz alyp kelgen eki zeınetkerdiń ústinen qylmystyq is qozǵaldy
QARAǴANDY. QazAqparat – Qaraǵandy oblysynda eki zeınetker 20 jyl boıy joǵary kólemdegi zeınetaqyny zańsyz alyp kelgen. Memleketke keltirilgen shyǵyn 16,7 mln teńgeni qurady, dep habarlaıdy QazAqparat Polisia.kz saıtyna silteme jasap.
Qaraǵandy polıtseıleri eńbek kitapshasyna jalǵan málimet engizýdiń eki faktisin anyqtady.
«30 tamyz kúni Qaraǵandy qalalyq Polıtsııa basqarmasy Ortalyq polıtsııa bólimine alaıaqtyqtyń eki faktisi boıynsha ister kelip tústi. Anyqtalǵandaı, 71 jastaǵy er adam 2000 jyly eńbek ótili týraly jalǵan málimetter usynǵan. Osylaısha, 20 jylda alǵan zeınetaqy tóleminiń jalpy somasy 7,4 mln teńgeni qurady.
Sondaı-aq eńbek ótilin óz paıdasyna qaraı jazyp alǵan 75 jastaǵy áıel 20 jyl boıy joǵary kólemdegi zeınetaqy alyp kelgen. Solaısha memleketke 9,3 mln teńge shyǵyn keltirdi.
Atalǵan faktiler boıynsha QR Qylmystyq kodeksiniń 190-babymen (Alaıaqtyq) qylmystyq ister qozǵaldy. Tergeý júrip jatyr», - delingen aqparatta.
