Zeınetaqyny paıdalaný: Qaryzyn erte japqysy kelgender aıypaqy tóleýge mindetti me

NUR-SULTAN. QazAqparat – Jekelegen qazaqstandyqtar zeınetaqynyń bir bóligin paıdalaný arqyly turǵyn úı ıpotekasynyń negizsi qaryzyn jabý kezinde bankke aıypaqyny tóleýge mindettelgen. Bul máseleniń anyq-qanyǵyn «Otbasy bank» basshysy Lázzat Ibragımova aıtyp berdi, dep habarlaıdy QazAqparat tilshisi.

«2016 jyly merziminen buryn bereshekti óteýge qatysty zańǵa ózgerister men tolyqtyrýlar engizildi. Bankke qaryz berý – nesıe arqyly tabys tabýǵa bolatyn múmkindik. Máselen, eger men kommertsııalyq banktiń basshysy bolsam, depozıti bar azamattarǵa jylyna 10 paıyz tóleımin de, nesıeni 14 paıyzben beremin. ıAǵnı 4 paıyz – ıpoteka boıynsha ekinshi deńgeıli banktiń marjasy. Qazaqstanda bankterdiń tabysy ortasha eseppen osyndaı», - dedi Lázzat Ibragımova BaigeNews.kz portalynyń YouTube-arnasyndaǵy suhbatynda.

Onyń aıtýynsha, eger kredıt alýshy nesıeni merziminen buryn japqysy kelse, bankke bul jaǵdaı asa tıimdi emes. Sebebi ol uzaq merzimdi tabysynan aıyrylady.

«Nege deseńiz, óziniń damý baǵdarlamasynda, bıýdjetinde bank ylǵı da paıyzdyq tabysyn eseptep qoıady. Sondyqtan negizgi qaryzdy merziminen buryn tólegen jaǵdaıda aıypaqyny qosyp qoıǵan. Biraq zańnama muny qazir qatań qadaǵalaıdy. Eger siz kelisimshart negizinde ıpotekalyq nesıe alsańyz, onda aıyppul, ıaǵnı aıypaqy qaryz alǵan merzimnen bastap 6 aı ǵana kúshinde bolady. Ary ketkende 12 aı. Osy merzimnen keıin siz eshqandaı aıypaqysyz nemese aıyppulsyz negizgi qaryzdy jaba alasyz», - dedi ol.