Zeınetaqyny Qazaqstannan bólek Reseı men Qytaıdan da alǵysy keletinder bar - mınıstrlik
Keńes barysynda azamattardy zeınetaqymen jáne áleýmettik qamsyzdandyrý, medıtsınalyq-áleýmettik saraptama júrgizý, múgedektigi bar adamdardy áleýmettik qorǵaý salasynda jáne arnaýly áleýmettik qyzmetter kórsetý salasynda memlekettik baqylaýdy júzege asyrý máseleleri qaraldy.
Birinshi jartyjyldyqtyń qorytyndysy boıynsha Qazaqstanda 3 mln 558 myń zeınetaqy men járdemaqy alýshy tirkelgen. Osy jyldyń 6 aıynda aýmaqtyq departamentter zeınetaqy men járdemaqy taǵaıyndaýǵa arnalǵan 1 mln 233 myń is maketin qarady, bul ótken jyldyń sáıkes kezeńindegi kórsetkishten 12,7% - ǵa artyq.
Zeınetaqylar men járdemaqylardy taǵaıyndaý kezindegi negizgi problemalyq máseleler azamattardyń zeınetke shyǵar aldynda tabysyn joǵary etip kórsetýi, jasyna baılanysty beriletin zeınetaqyny eki ret – Qazaqstannan jáne Reseıden alýy, Qytaıdan kelgen qandastardyń eńbek qyzmeti týraly jalǵan qujattardy usynýy bolyp tabylady.
Bul máselelerdi sheshý joldary Qarjy, Syrtqy ister, Іshki ister mınıstrlikteriniń jáne «Azamattarǵa arnalǵan Úkimet» Memlekettik korporatsııasy» KEAQ ókilderimen birge talqylandy.
Keńes barysynda múgedektikti anyqtaý boıynsha medıtsınalyq-áleýmettik saraptama júrgizý máselesi de qaraldy. Mınıstr múgedektigi bar adamdardy syrttaı kýálandyrý boıynsha pılottyq jobany iske asyrýdyń oń nátıjelerin atap ótti. 2022 jyldyń basynan beri Qazaqstannyń barlyq óńirlerinen 31,9 myńǵa jýyq ótinim qaraldy. Múgedektikti belgileý boıynsha syrttaı qyzmet kórsetý 22%-dy qurady, bul osy jylǵa josparlanǵan kórsetkishten 2%-ǵa artyq.
Syrttaı kýálandyrýǵa kóshý: ákimshilik jáne bıýrokratııalyq kedergilerdi joıady; saraptamalyq sheshimderdiń ashyqtyǵyn qamtamasyz etedi; úıden shyqpaı-aq múgedektikti belgileý jáne múgedektigi bar adamdardy áleýmettik qorǵaý sharalaryn aıqyndaý boıynsha qyzmetter alýǵa múmkindik beredi; kórsetiletin qyzmetti alýshynyń kórsetiletin qyzmetti berýshimen tikeleı baılanysyn boldyrmaıdy, osylaısha sybaılas jemqorlyq táýekelderin barynsha azaıtady.
Sondaı-aq, Keńeste múgedektigi bar adamdardy áleýmettik qorǵaý salasyndaǵy tekserý nátıjeleri talqylandy. 2022 jyldyń birinshi jartyjyldyǵynda 606 tekserý júrgizildi, onyń barysynda 2,6 myń zańbuzýshylyq anyqtaldy. 497 uıǵarym berildi, 146 baqylaý sýbektisine jalpy somasy 27,8 mln teńgege aıyppul salyndy.
«Osy máselelerdi talqylaǵannan keıin Tamara Dúısenova Eńbek jáne áleýmettik qorǵaý komıtetiniń aýmaqtyq departamentteriniń jumys sapasyn arttyrýǵa, halyqty zeınetaqymen jáne áleýmettik qamsyzdandyrý salasynda kórsetiletin memlekettik qyzmetterdiń sapasyn arttyrýǵa baǵyttalǵan birqatar tapsyrma berdi»,-delingen habarlamada.
Foto: gov.kz
