Zeınetaqy júıesin jetildirý, erteń qur shóppen aýyz súrtip qalmaýǵa sep - R. Halmuradov
ASTANA. 17 sáýir. QazAqparat - Ulttyq qor qarjysyn qazir zeınetaqy júıesine jumsap, erteń qur shóppen aýyz súrtip qalmaıyq. Týra osy ustanymdy qamtyǵan úkimettik zań jobasyn qoldaımyn. Búgin Parlament Májilisinde «Qazaqstan Respýblıkasynda zeınetaqymen qamsyzdandyrý týraly» zań jobasyn talqylaý barysynda depýtat Rozaqul Halmuradov osylaı málim etti.
Depýtattyń aıtýnysha, zeınetaqy júıesin jańǵyrtýǵa baǵyttalǵan zań jobasynda búgingi zeınetkerlerdiń de, keleshek zeınetkerlerdiń de, erler men áıelderdiń de taǵdyry bar. «Rasynda zeınetkerliktiń búgingi júıesi jáne qoldanystaǵy zeınetaqy týraly zańymyzben alysqa bara almasymyz anyq. Áıelderdiń jasyn birizdendirý, shyn máninde ásirese aýyldaǵylar úshin aýyrǵa soǵýy múmkin, biraq odan qashyp qutyla almaıtynymyzdy túsinýge tıispiz. Sebebi bul damyǵan elderdiń barlyǵynda bar tájirıbe. Búginniń emes, bolashaqtyń qamyn oılaǵannan týyndaıtyn másele dep bilemin», - dedi depýtat.
Onyń aıtýynsha, áıelderdiń zeınet jasyn uzarta otyryp, atqarýshy bılik olardyń ýaıymsyz ómirine jaǵdaı jasaýlary kerek. «Uzaq jyldar eńbek etýine baılanysty áleýmettik mártebeniń saqtalýy, laıyqty zeınetaqy jınaqtaryn jasaýdyń joldary jan-jaqty qarastyrylyp, kezeń-kezeńimen júzege asyrylýy tıistigi aıqyn bolyp otyr. Bunyń barlyǵy búgin aıqyndalyp, josparlanbasa, erteńgi kúni kesh bolady», - dedi ol.
«Jalpy alǵanda Úkimettiń Ulttyq qor qarjysyn aldaǵy jyldary qoldanystaǵy zeınetaqy júıesi boıynsha paıdalanyp, túgesip tastap, odan keıin qur shóppen aýyz súrtip qalmaıyq, dep aldyn ala qam jasap jatqanyn qoldaımyn», - dedi R. Halmuradov.
Eske salsaq, zań jobasynyń basty jańalyǵy áıelderdiń zeınetkerlik jasyn birizdendirý bolyp tabylady. Bul rette zań jobasynda qamtylǵandaı, 2014 jyldyń 1 qańtarynan bastap zeınetkerlik jasty jyl saıyn 6 aıǵa ulǵaıta otyryp, birtindep 10 jyldyń ishinde zeınetkerlik jasty kóterýdi júzege asyrý kózdeledi. Sóıtip, 2023 jyldan bastap áıelder men erler úshin zeınetkerlik jas 63-ke teńesedi.
