Zeınetaqy júıesin jańǵyrtýǵa baǵyttalǵan zań Parlament qyzmetine teris áser etken joq - Senat Tóraǵasy
ASTANA. 27 maýsym. QazAqparat - Zeınetaqy júıesin jańǵyrtýǵa baǵyttalǵan zań Parlament qyzmetine teris áser etken joq.
Búgin Parlament Senatynyń jalpy otyrysynan soń, sessııanyń aıaqtalýyna oraı ótken brıfıngte jýrnalıster saýalyna jaýap bergen Senat Tóraǵasy Qaırat Mámı osylaı málimdedi.
«Zeınetaqy júıesin jańǵyrtýǵa baǵyttalǵan zańǵa Memleket basshysynyń qol qoımaýyn Parlamentke teris áser etti dep aıta almaımyn. Jalpy zań tujyrymdamaly túrde maquldandy, tek ondaǵy normalar 2014 jyldan 2018 jylǵa qaraı ysyryldy. Al bizdiń senatorlar talqylaý barysynda kótergen barlyq máselelerdi Elbasy da qoldady jáne dál sol máseleler boıynsha 2018 jylǵa deıin arnaıy sharalar atqarý júkteldi», - dedi Q. Mámı.
Sonymen qatar, spıker zań jobalarynyń Parlamentpen qabyldaný ereksheligine de toqtaldy. Tóraǵanyń aıtýynsha, eger Parlament depýtattarynyń qandaı da bir usynystary qosymsha qarjylyq shyǵyndardy talap etetin bolsa, onda bul usynystar Úkimetpen kelisiledi. Eger Úkimet oń baǵalasa, onda bundaı usynystar zań jobasyna ene alady.
«Senatorlar osyǵan uqsas 20-ǵa tarta usynystardy Úkimetke joldaǵan edi. Olardan teris qorytyndy alyndy. Sondyqtan da, biz bundaı ózgeristerdi talqylanǵan zańǵa engize almadyq. Degenmen, barlyq depýtattar zeınetaqy júıesin jańǵyrtýǵa baǵyttalǵan zań jobasyn qoldady. Óıtkeni, ondaǵy másele tek áıelderdiń zeınet jasyn uzartý ǵana emes, zeınetaqy qorlaryn biriktirip, biryńǵaı zeınetaqy júıesin qalyptastyrý da qamtylǵan. Sondyqtan da, depýtattar zańdy qoldady. Elbasy da Úkimetke naqty tapsyrmalar júktedi. Jalpy Parlament zeınetaqyny jańǵyrtýǵa baǵyttalǵan zańdy qabyldaı otyryp, áıelder qaýymynyń múddelerin eskermedi degenmen esh kelise almaımyn», - dedi Q. Mámı.
