Zeınetaqy júıesin jańǵyrtýdy búgin sheshpesek, erteń kesh bolady - Z. Balıeva
ASTANA. 17 sáýir. QazAqparat - Zeınetaqy júıesin jańǵyrtýdy búgin sheshpesek, erteń kesh bolady. Búgin Parlament Májilisiniń jalpy otyrysynda «Qazaqstan Respýblıkasynda zeınetaqymen qamsyzdandyrý týraly» zań jobasyn talqylaý barysynda depýtat Zaǵıpa Balıeva osylaı málim etti.
«Parlament te, Úkimet te zamanymyzdyń qaterlerine laıyqty jaýap qatýy kerek. Osy turǵydan alsaq, zeınetaqyny jańǵyrtý qazirgi zamandaǵy qater bolyp tabylady. Biz erteńgi kúni qarajat jetpeı, zeınetaqy tólemderine qarjy taba almaı qalmas úshin, búgin osyndaı qadamdarǵa barýymyz kerek. Biz búgin osy máseleni sheshpesek, onda erteńgi kúni «biz nege olqylyqty ýaqytynda sheshpedik, nege zeınetaqy tóleýge múmkin bolmaıtyn sharalardy jiberip qoıdyq?» degen saýaldarǵa jaýap izdeıtin bolamyz », dedi depýtat Zaǵıpa Balıeva.
