Zeınetaqy júıesi: 1 shildede kúshine enetin Áleýmettik kodekste qandaı jańashyldyq bar
«2023 jyldyń 1 shildesinen mindetti zeınetaqy jarnalary (MZJ) jáne mindetti kásiptik zeınetaqy jarnalary (MKZJ) esebinen qalyptastyrylǵan zeınetaqy jınaqtaryn ınvestıtsııalyq portfeldi basqarýshynyń (IPB) senimgerlik basqarýyna berý kezinde zeınetaqy jınaqtarynyń eń tómengi jetkiliktilik shegi budan bylaı eskerilmeıdi. Salymshy joǵaryda atalǵan jınaqtarynyń 50% deıin IPB-nyń senimgerlik basqarýyna berýge quqyly», - dedi «BJZQ» AQ basqarma tóraǵasy Janat Qurmanov.
Onyń aıtýynsha, zeınetaqy jınaqtarynyń saqtalýyna memlekettik kepildik Ulttyq banktiń basqarýyndaǵy jınaqtar boıynsha ǵana beriledi.
«Salymshy jınaqtardy bir nemese birneshe IPB-ǵa aýdarǵan kezde jınaqtardyń saqtalýy men tabystylyǵyn osy kompanııalar qamtamasyz etedi. Sondyqtan, óz jınaqtaryńyzdy IPB basqarýyna aýdarmaı turyp, BJZQ saıtynan naryqtaǵy basqarýshy kompanııalardyń qoldanystaǵy tizbesin qarap, olardyń ınvestıtsııalyq deklaratsııalaryn, ınvestıtsııalyq qyzmetterine sholýlardy, ınvestıtsııalaý tájirıbesi men nátıjelerin zerdelep, táýekelderdi baǵalaýǵa keńes beremiz», - dedi spıker.
Sonymen birge zeınetaqy jınaqtaryn IPB senimgerlik basqarýynan Ulttyq banktiń senimgerlik basqarýyna qaıtarý múmkindigi beriletin merzim 2 jyldan 1 jylǵa deıin qysqarady.
«Buǵan deıin jasalǵan zeınetaqy annýıteti sharty bolǵan jaǵdaıda, IPB senimgerlik basqarýyna berýge qoljetimdi zeınetaqy jınaqtarynyń mólsheri ózgerissiz qalady – salymshynyń JZSh-daǵy zeınetaqy jınaqtary somasynyń 100%», - dedi ol.
Zeınetaqy jınaqtaryn bir nemese birneshe IPB-ǵa aýdarý, sondaı-aq, jınaqtardy Ulttyq banktiń basqarýyna qaıtarý úshin salymshy BJZQ-ǵa ótinishpen júginýi qajet.
Ony BJZQ saıtyndaǵy jeke kabınet arqyly ne BJZQ-nyń kez kelgen bólimshesine ózi júgingen kezde berýge bolady.
Buǵan deıin zeınetaqy júıesinde aldaǵy bes jylda qandaı ózgerister qarastyrylǵanyn jazǵan edik.